اسلام آباد ایئرپورٹ پر اے ایس ایف کی کارروائی، 548 گرام چرس برآمد

اسلام آباد انٹرنیشنل ایئرپورٹ پر ایئرپورٹس سیکیورٹی فورس (اے ایس ایف) نے منشیات اسمگلنگ کی کوشش ناکام بنا دی۔ اے ایس ایف اہلکاروں نے بیرونِ ملک جانے والے ایک مسافر کو مشکوک حرکات پر نگرانی میں لیا اور سیکیورٹی چیک کے دوران اس کے جوتوں کی دستی تلاشی لی۔

تلاش کے دوران جوتوں کے تلووں میں نہایت مہارت سے چھپائی گئی چرس برآمد ہوئی، جس کا وزن 548 گرام تھا۔ مسافر اسلام آباد سے ابو ظہبی جا رہا تھا۔

ملزم کو حراست میں لے کر ابتدائی تفتیش مکمل کی گئی اور بعد ازاں منشیات سمیت اینٹی نارکوٹکس فورس (ANF) کے حوالے کر دیا گیا۔

ترجمان اے ایس ایف کے مطابق یہ کارروائی معمول کی نگرانی کے دوران عمل میں آئی اور ملک کے تمام ایئرپورٹس پر سیکیورٹی مزید سخت کر دی گئی ہے تاکہ منشیات اسمگلنگ کی کوششوں کو ناکام بنایا جا سکے۔