ڈیڑھ سالہ پرفارمنس کا جائزہ لیں تو ٹیم کی حالت سامنے آ جائے گی، عاقب جاوید کا سلیکشن کمیٹی اور شان مسعود کی کپتانی پر اہم بیان

پاکستان کرکٹ ٹیم کے سابق کرکٹر اور سلیکٹر عاقب جاوید نے قومی ٹیم کی کارکردگی پر کڑی تنقید کرتے ہوئے کہا ہے کہ اگر پچھلے ڈیڑھ سال کے نمبرز اور اعداد و شمار ملائیں تو آپ کو ٹیم کی اصل پرفارمنس کا پتہ چل جائے گا۔

میڈیا سے گفتگو کرتے ہوئے عاقب جاوید کا کہنا تھا کہ مصباح الحق اور سرفراز احمد چھ ماہ قبل ہی سلیکشن کمیٹی کا حصہ بنے ہیں۔ انہوں نے واضح کیا کہ کرکٹ کے تینوں فارمیٹس میں طویل عرصے سے درپیش مسائل کو درست طریقے سے ایڈریس نہیں کیا جا رہا تھا جس کا خمیازہ ٹیم بھگت رہی ہے۔

سابق کرکٹر نے کپتان کے کردار کو کلیدی قرار دیتے ہوئے کہا کہ کسی بھی ٹیم میں کپتان کی ذمہ داری سب سے اہم ہوتی ہے۔ ٹیسٹ کپتان شان مسعود کے حوالے سے بات کرتے ہوئے عاقب جاوید نے ریمارکس دیے کہ شان مسعود کے دور میں بطور کھلاڑی ان کی اپنی انفرادی پرفارمنس تو اچھی رہی، لیکن ان کی کپتانی کی پرفارمنس اچھی نہیں رہی، جس کی وجہ سے ٹیم مطلوبہ نتائج حاصل کرنے میں ناکام رہی۔