آبنائے ہرمز میں غیر ملکی فوج کی موجودگی ناقابل قبول، ایران کا سخت انتباہ

ایران نے آبنائے ہرمز میں غیر ملکی فوجی موجودگی پر سخت تشویش کا اظہار کرتے ہوئے واضح کیا ہے کہ یہ حساس اور اہم آبی گزرگاہ کسی بھی بیرونی طاقت کے فوجی مظاہرے کی جگہ نہیں بن سکتی۔

ایران کے نائب وزیر خارجہ برائے قانونی و بین الاقوامی امور، کاظم غریب آبادی نے سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے ایک بیان میں کہا کہ آبنائے ہرمز کی سلامتی برقرار رکھنے کی اصل ذمہ داری صرف ایران اور عمان پر عائد ہوتی ہے۔ انہوں نے خبردار کیا کہ خطے میں کسی بھی قسم کی بیرونی فوجی نقل و حرکت کو ہرگز قابل قبول نہیں سمجھا جائے گا، لہٰذا خطے میں غیر ضروری فوجی سرگرمیوں سے گریز کیا جائے۔ ان کا کہنا تھا کہ ایران اس اہم سمندری راستے کا ذمہ دار اور سلامتی کا ضامن ملک ہے۔

ایرانی حکام کا یہ سخت بیان ایک ایسے وقت میں سامنے آیا ہے جب برطانوی وزیراعظم کیئر اسٹارمر اور فرانسیسی صدر ایمانوئل میکرون نے مشترکہ بیان جاری کرتے ہوئے آبنائے ہرمز کو عالمی معیشت کی لائف لائن قرار دیا تھا۔ دونوں مغربی رہنماؤں کا موقف تھا کہ تمام ممالک کے جہازوں کی محفوظ آمدورفت عالمی برادری کی مشترکہ ذمہ داری ہے، اور عمان، برطانیہ اور فرانس کے ساتھ مل کر تجارتی جہاز رانی کو یقینی بنانے کے لیے تعاون کرے گا۔ ضرورت پڑنے پر برطانیہ اور فرانس کثیرالقومی بحری مشن تعینات کرنے کے لیے بھی تیار ہیں۔

دوسری جانب، ایرانی خبر رساں ادارے ‘فارس’ اور بین الاقوامی میڈیا رپورٹس کے مطابق تازہ ترین بحری صورتحال تشویشناک دکھائی دیتی ہے۔ عمان کے ساحل کے قریب آبنائے ہرمز کو عبور کرنے کی کوشش کرنے والے کم از کم 8 تجارتی جہازوں اور آئل ٹینکرز کو اچانک واپس موڑ دیا گیا ہے، جبکہ کچھ جہازوں نے ایرانی حکام کی ہدایات پر عمل کرتے ہوئے اپنا بحری راستہ تبدیل کر لیا ہے۔