مؤثر سفارتکاری اور امن سے پاکستان کا عالمی تشخص مضبوط ہوا: فیصل کریم کنڈی

گورنر خیبر پختونخوا فیصل کریم کنڈی نے کہا ہے کہ مؤثر سفارتکاری اور امن کی بدولت پاکستان کا عالمی تشخص مضبوط ہوا ہے، اور دنیا آج پاکستان کو امن کا داعی اور ضامن تسلیم کر رہی ہے۔

بونیر میں پارٹی کنونشن سے خطاب کرتے ہوئے گورنر خیبر پختونخوا فیصل کریم کنڈی کا کہنا تھا کہ پلوامہ واقعے کی آڑ میں پاکستان کو دہشت گرد ریاست قرار دلوانے کی بھارتی کوشش ناکام ہوئی، جبکہ پاکستان نے بھارتی جارحیت کا منہ توڑ جواب دے کر اپنی دفاعی صلاحیت کا بھرپور مظاہرہ کیا۔ انہوں نے کہا کہ عالمی برادری نے جنگ بندی کے لیے پاکستان سے رابطہ کیا اور پاکستان نے عالمی امن کے فروغ کے لیے مؤثر سفارتی کردار ادا کیا۔ یہی وجہ ہے کہ آج امریکا، چین، روس اور عرب ممالک پاکستان کے مثبت کردار کو سراہ رہے ہیں۔

ان کا کہنا تھا کہ شہید ذوالفقار علی بھٹو نے پاکستان کے ایٹمی پروگرام کی بنیاد رکھی، شہید بینظیر بھٹو نے میزائل پروگرام کو آگے بڑھایا، جبکہ صدر آصف علی زرداری جے ایف-17 تھنڈر ٹیکنالوجی پاکستان لائے۔ فیلڈ مارشل، وزیر اعظم، نائب وزیر اعظم اور وزیر داخلہ نے بھی قومی مفادات کے تحفظ میں ہمیشہ اہم کردار ادا کیا۔

گورنر خیبرپختونخوا نے صوبے کی معیشت پر بات کرتے ہوئے کہا کہ امن کے قیام کے بعد دنیا سرمایہ کاری کے لیے پاکستان کا رخ کرے گی۔ خیبرپختونخوا قدرتی وسائل، سیاحت، تیل، گیس اور معدنیات سے مالا مال صوبہ ہے اور اس کی ترقی کے لیے امن کا قیام ناگزیر ہے۔ انہوں نے صوبائی حکومت پر زور دیا کہ وہ وفاق کے ساتھ مل کر صوبے میں امن و امان کی صورتحال کو بہتر بنانے کے لیے مؤثر اقدامات کرے۔ فیصل کریم کنڈی نے واضح کیا کہ پارٹی ورکرز کے لیے گورنر ہاؤس کے دروازے ہمیشہ کھلے ہیں، اور انہوں نے کامیاب پارٹی کنونشن کے انعقاد پر ضلعی قیادت اور کارکنوں کو مبارکباد بھی پیش کی۔