مشرقی امریکا میں گرمی اور ہیٹ ویو سے 25افراد ہلاک

مشرقی امریکا میں شدید گرمی اور ہیٹ ویو نے تباہی مچا دی ہے، جہاں مختلف ریاستوں میں گرمی سے متعلقہ پیچیدگیوں کے باعث کم از کم 25 افراد ہلاک ہو گئے ہیں۔

امریکی میڈیا رپورٹس کے مطابق، امریکا کے یومِ آزادی (4 جولائی) کے موقع پر ملک کے مختلف علاقے شدید ترین گرمی کی لپیٹ میں رہے، جس کے باعث پاور گرڈز پر دباؤ بڑھنے سے بجلی کا بڑا بریک ڈاؤن بھی دیکھنے میں آیا۔ بجلی کی عدم فراہمی اور شدید تپش کی وجہ سے کئی شہروں میں یومِ آزادی کی سالانہ تقریبات منسوخ کر دی گئیں۔

حکام کے مطابق، شدید گرمی کے پیشِ نظر دارالحکومت واشنگٹن ڈی سی میں شیڈول مرکزی پریڈ کو بھی منسوخ کرنا پڑا۔ رپورٹ میں بتایا گیا ہے کہ اس وقت امریکا میں 15 کروڑ سے زائد آبادی کو شدید ترین گرمی اور ہیٹ ویو کی وارننگ کا سامنا ہے۔ ہفتے کے روز واشنگٹن، ورجینیا اور نارتھ کیرولینا سمیت کئی مشرقی ریاستوں میں درجہ حرارت 38 ڈگری سینٹی گریڈ تک ریکارڈ کیا گیا، جبکہ ہوا میں نمی کے تناسب کے باعث گرمی کی شدت اس سے کہیں زیادہ محسوس کی جا رہی ہے۔ موسمیاتی ماہرین نے شہریوں کو بلا ضرورت گھروں سے نہ نکلنے کی ہدایت کی ہے۔