حکومتی یقین دہانیوں پر عمل نہ ہونے پر ایم کیو ایم کا وفاقی کابینہ کے اگلے اجلاس میں احتجاج کا فیصلہ

متحد ہ قومی موومنٹ (ایم کیو ایم) پاکستان نے وفاقی حکومت کی جانب سے یقین دہانیوں پر عمل نہ ہونے اور مطالبات کی عدم منظوری پر وفاقی کابینہ کے اگلے اجلاس میں بھرپور احتجاج کرنے کا فیصلہ کر لیا ہے۔

ذرائع کے مطابق یہ فیصلہ ایم کیو ایم پاکستان کے کنوینر ڈاکٹر خالد مقبول صدیقی کی زیرِ صدارت منعقدہ ایک اہم مشاورتی اجلاس میں کیا گیا۔ اجلاس کے دوران پارٹی کی دو سالہ کارکردگی، وفاقی حکومت کی جانب سے کرائی گئی یقین دہانیوں اور وزیراعظم سے ہونے والی مختلف ملاقاتوں کے احوال پر تفصیلی بات چیت کی گئی۔

ایم کیو ایم قیادت نے سخت تحفظات کا اظہار کرتے ہوئے مؤقف اپنایا کہ وفاق کے ساتھ طے شدہ امور اور فوری قابلِ عمل معاملات کو بھی حکومت کی جانب سے مسلسل نظرانداز کیا جا رہا ہے۔ ذرائع کا کہنا ہے کہ وفاقی کابینہ کے اجلاس کے ساتھ ساتھ ایم کیو ایم کے وزراء اور رہنما وزیراعظم کے سامنے بھی براہِ راست اپنا سخت احتجاج ریکارڈ کرائیں گے۔

اس اجلاس کی ایک اور اہم بات یہ تھی کہ کئی ماہ کے طویل عرصے کے بعد سینئر رہنما مصطفیٰ کمال کے قریبی ارکانِ اسمبلی نے بھی اس میں خصوصی طور پر شرکت کی، جس کے بعد پارٹی کے آئندہ کے لائحہ عمل اور احتجاجی حکمتِ عملی کو حتمی شکل دی جا رہی ہے۔