پشاور: چینی باشندوں کی حفاظت کےلئے فول پروف نظام قائم

خیبر پختونخوا میں پن بجلی سمیت مختلف اہم تعمیراتی منصوبوں پر کام کرنے والے چینی باشندوں کی حفاظت کو یقینی بنانے کے لیے پولیس نے ایک فول پروف سکیورٹی نظام قائم کر دیا ہے، جس کے تحت اسپیشل سیکیورٹی یونٹ (SSU) کا پہلا کمانڈ اینڈ کنٹرول روم قائم کر دیا گیا ہے۔

پولیس حکام کے مطابق یہ اسپیشل سیکیورٹی یونٹ کنٹرول روم 24 گھنٹے فعال رہے گا، جبکہ اس یونٹ کا پہلا باقاعدہ دستہ پشاور کے باچا خان انٹرنیشنل ایئرپورٹ پر تعینات کر دیا گیا ہے۔ ایئرپورٹ پر تعینات ایس ایس یو اہلکار چوبیس گھنٹے سکیورٹی خدمات انجام دیں گے۔ اس یونٹ میں شامل افسران اور اہلکاروں کے پہلے بیچ کو چینی باشندوں سے بہتر رابطے کے لیے چینی زبان کا خصوصی کورس بھی کرایا گیا ہے۔

حکام کا مزید کہنا ہے کہ چینی باشندوں سمیت دیگر تمام غیر ملکیوں کی محفوظ آمدورفت کے لیے ایک جامع 28 نکاتی سکیورٹی پلان تیار کیا گیا ہے۔ اس پلان کے تحت وفاقی اداروں کے تعاون سے تعمیراتی منصوبوں تک رسائی کے لیے سخت ایس او پیز (SOPs) مرتب کی گئی ہیں۔ سینٹرل کمانڈ اینڈ کنٹرول یونٹ چینی باشندوں کے کانوائے (قافلے) کو منصوبے کی جگہ تک مکمل سکیورٹی فراہم کرے گا اور کمپیوٹرائزڈ نظام کے ذریعے کانوائے کی لائیو لوکیشن کو مسلسل مانیٹر کیا جائے گا، جبکہ تمام اضلاع کو بھی بروقت معلومات فراہم کی جائیں گی۔ اس کے علاوہ چینی شہریوں کو کسی بھی ہنگامی صورتحال سے نمٹنے کے لیے ایک فوری ایمرجنسی نمبر بھی فراہم کیا جائے گا۔

واضح رہے کہ چینی کمپنیاں اس وقت خیبر پختونخوا میں داسو، بھاشا اور مہمند ڈیم سمیت کئی بڑے پن بجلی منصوبوں کی تعمیراتی سرگرمیوں میں مصروف ہیں۔ اسی طرح سی پیک (CPEC) کے تحت رشکئی اکنامک زون اور پشاور بی آر ٹی (BRT) جیسے اہم منصوبوں میں بھی چینی ماہرین بطور شراکت دار خدمات انجام دے رہے ہیں، جن کی سکیورٹی کو اب مزید سخت کر دیا گیا ہے۔