ایران اور قطر کے درمیان بحری تجارت 5 ماہ بعد بحال

قطر کے دارالحکومت دوحہ میں تعینات ایرانی کمرشل اتاشی عباس عبدالخانی کے مطابق، 5 ماہ کے طویل تعطل کے بعد ایران کی دیّر بندرگاہ اور قطر کی الرویس بندرگاہ کے درمیان تجارتی جہازوں کی آمدورفت دوبارہ شروع ہوگئی ہے۔

برطانوی خبر رساں ادارے کے مطابق، دونوں ممالک کے درمیان بحری تجارت کی یہ بحالی دوحہ میں ایرانی اور قطری حکام کے درمیان ہونے والے کامیاب مذاکرات کے بعد عمل میں آئی ہے۔ واضح رہے کہ یہ دونوں بندرگاہیں خلیجی ممالک کے درمیان علاقائی اور تجارتی سرگرمیوں کے لیے انتہائی اہم کردار ادا کرتی ہیں، تاہم ایران کی دیّر بندرگاہ چار ماہ تک جاری رہنے والی جنگ کے دوران متعدد بار حملوں کا نشانہ بنی تھی جس کے باعث تجارتی سرگرمیاں معطل ہو گئی تھیں۔

رپورٹ کے مطابق، گزشتہ ماہ تہران اور واشنگٹن کے درمیان طے پانے والے ایک عبوری معاہدے کے تحت جنگ بندی پر اتفاق کیا گیا تھا، جس کے بعد خلیج میں جنگ سے پہلے والی بحری تجارتی سرگرمیوں کو بحال کرنے کا اہم فیصلہ کیا گیا۔ اگرچہ خلیج فارس میں جہازوں کی آمدورفت اب بھی مکمل طور پر معمول پر نہیں آ سکی ہے اور بعض بحری راستوں پر اب بھی کشیدگی برقرار ہے، تاہم اس سفارتی پیش رفت کو تجارتی سرگرمیوں کی بحالی کے لیے ایک مثبت قدم قرار دیا جا رہا ہے۔