عباس عراقچی سے حماس اور حزب اللہ کے وفود کی ملاقات، حمایت جاری رکھنے کا اعادہ

ایران کے وزیرِ خارجہ عباس عراقچی سے حماس اور حزب اللہ کے اعلیٰ سطح کے وفود نے اہم ملاقاتیں کی ہیں، جن میں مشرقِ وسطیٰ کی مجموعی صورتحال اور اسرائیلی کارروائیوں کے خلاف مشترکہ حکمتِ عملی پر تفصیلی تبادلۂ خیال کیا گیا ہے۔

عرب میڈیا کے مطابق، ان ملاقاتوں کے دوران ایرانی وزیرِ خارجہ عباس عراقچی نے دوٹوک انداز میں کہا کہ تہران اسرائیلی جارحیت کے خلاف حماس اور حزب اللہ کی سیاسی، سفارتی اور اخلاقی حمایت جاری رکھنے کے اپنے اصولی عزم پر قائم ہے۔

حزب اللہ کے وفد سے خصوصی گفتگو کرتے ہوئے عباس عراقچی نے واضح کیا کہ مفاہمتی یادداشت کے مطابق لبنان میں جنگ کے فوری خاتمے اور کشیدگی میں کمی لانے کے لیے تہران اپنی سفارتی کوششیں پوری تندہی سے جاری رکھے گا۔ ملاقاتوں میں خطے کی مجموعی سیکیورٹی صورتحال، لبنان اور غزہ میں جاری حالیہ پیش رفت اور اسرائیل کے ساتھ بڑھتی ہوئی کشیدگی سے نمٹنے کے لیے مختلف امور پر مشاورت کی گئی۔