امریکا: ایک غلطی نے خاتون کولاکھوں ڈالر جتوا دیے

امریکی ریاست الی نوائے کے شہر جانسن سٹی سے تعلق رکھنے والی ایک خاتون کی معمولی سی غلطی خوش قسمتی میں بدل گئی، جس کے نتیجے میں وہ ڈھائی لاکھ ڈالر کا جیک پاٹ جیتنے میں کامیاب ہو گئیں۔

میڈیا رپورٹس کے مطابق ہولی نامی خاتون نے بتایا کہ وہ ایک ویب سائٹ کے ذریعے دو ڈالر کا فاسٹ پلے ٹکٹ خریدنا چاہ رہی تھیں، تاہم غلطی سے انہوں نے 20 ڈالر کا میگنیفیسنٹ ملٹی پلائر ٹکٹ خرید لیا۔ ہولی کے مطابق وہ اس وقت فلم دیکھ رہی تھیں اور غیر ارادی طور پر مہنگا ٹکٹ خرید بیٹھی تھیں۔

بعد ازاں جب انہوں نے ٹکٹ کے نتائج چیک کیے تو ان پر حیرت کے پہاڑ ٹوٹ پڑے، کیونکہ اسی ٹکٹ نے انہیں 2 لاکھ 50 ہزار ڈالر کا جیک پاٹ جتوا دیا۔ ہولی کا کہنا تھا کہ ابتدا میں انہیں اپنی آنکھوں پر یقین نہیں آیا اور کچھ دیر تک وہ یہ سمجھتی رہیں کہ شاید کوئی غلطی ہو گئی ہے۔

خاتون نے اس غیر متوقع کامیابی کو اپنی زندگی کا یادگار لمحہ قرار دیا اور کہا کہ کبھی کبھی ہونے والی چھوٹی سی غلطی بھی بڑی خوشی کا سبب بن سکتی ہے۔