بیلاروس کی جدید طبی ٹیکنالوجی قابلِ تحسین ہے، چیئرمین سینیٹ

چیئرمین سینیٹ سید یوسف رضا گیلانی نے اپنے سرکاری دورۂ بیلاروس کے دوران دارالحکومت منسک میں قائم منسک سائنٹیفک اینڈ پریکٹیکل سینٹر کا دورہ کیا اور طبی مرکز میں منعقدہ ایک خصوصی تقریب سے خطاب کیا۔ انہوں نے اس موقع پر بیلاروس کی جدید طبی ٹیکنالوجی اور طبی شعبے میں کی جانے والی ترقی کو بے حد سراہا۔

تقریب سے خطاب کرتے ہوئے چیئرمین سینیٹ نے کہا کہ پاکستان اور بیلاروس کے درمیان صحت، ٹیکنالوجی اور ثقافتی شعبوں میں باہمی تعاون کے وسیع ترین امکانات موجود ہیں۔ انہوں نے اعضا کی پیوند کاری (Transplantation)، روبوٹک سرجری اور مصنوعی ذہانت (AI) پر مبنی بیماریوں کی تشخیص میں بیلاروس کی پیش رفت کو انتہائی قابلِ قدر قرار دیتے ہوئے کہا کہ دونوں برادر ممالک کو طبی شعبے میں ادارہ جاتی روابط اور علمی تبادلوں کو مزید فروغ دینا ہوگا۔ ان کا کہنا تھا کہ جدید طبی ٹیکنالوجیز اور پیشہ ورانہ مہارتوں کے اشتراک سے پاکستان اور بیلاروس دونوں ممالک کے عوام بھرپور طریقے سے مستفید ہو سکتے ہیں۔

دورے کے دوران پاکستانی پارلیمانی وفد نے بیلاروس کے جدید ہائبرڈ آپریٹنگ کمپلیکس کا بھی دورہ کیا، جہاں انہوں نے مختلف جدید طبی طریقۂ کار کا براہِ راست مشاہدہ کیا۔

بعد ازاں، چیئرمین سینیٹ سید یوسف رضا گیلانی نے بیلاروسی اسٹیٹ میوزیم آف دی ہسٹری آف دی گریٹ پیٹریاٹک وار کا بھی دورہ کیا، جہاں انہوں نے جنگ کے دوران بیلاروسی عوام کی لازوال مزاحمت اور قربانیوں پر مبنی تاریخی نمائشوں کا باریک بینی سے مشاہدہ کیا۔ اس موقع پر انہوں نے بیلاروسی عوام کی بہادری اور استقامت کو زبردست خراجِ تحسین پیش کرتے ہوئے اس بات کا اعادہ کیا کہ پاکستان اور بیلاروس کے مابین دوستانہ تعلقات کو پارلیمانی اور عوامی سطح پر روابط کے ذریعے مزید مستفید اور مضبوط بنایا جا سکتا ہے۔