بلوچستان میں شرپسندوں کا ڈیرہ بگٹی پر حملہ پسپا، 13 دہشت گرد مارے گئے

بلوچستان کے ضلع ڈیرہ بگٹی کے علاقے بیکڑ میں دہشت گردوں نے چیئرمین ضلع کونسل ڈیرہ بگٹی وڈیرہ غلام نبی شمبھانی کے رہائشی مکان پر بزدلانہ حملہ کر دیا، تاہم وڈیرہ ہدایت شمبھانی کی زیرِ نگرانی سرگرم بگٹی امن فورس نے فوری اور بھرپور جوابی کارروائی کرتے ہوئے دہشت گردوں کا حملہ ناکام بنا دیا اور فائرنگ کے تبادلے میں 13 دہشت گردوں کو ہلاک کر دیا۔

قبائلی ذرائع کے مطابق شہید فضل خان سب ڈویژن میں گزشتہ شب شروع ہونے والی فائرنگ کا یہ سلسلہ رات بھر وقفے وقفے سے جاری رہا۔ حملہ آور دہشت گردوں نے فرار ہونے کی کوشش کی لیکن امن فورس کے جوانوں نے ان کا مؤثر تعاقب کیا اور تمام فرار کے راستے بند کرتے ہوئے انہیں عبرت ناک انجام تک پہنچا دیا۔ اس بہادرانہ اور دلیرانہ مقابلے کے دوران دہشت گردوں کی فائرنگ سے بگٹی امن فورس کا ایک جوان جامِ شہادت نوش کر گیا جبکہ تین جوان زخمی ہوئے، جنہیں فوری طبی امداد کے لیے کراچی منتقل کر دیا گیا ہے۔

مقامی قبائلی ذرائع کا کہنا ہے کہ بگٹی امن فورس کے جوانوں کی بروقت اور جرات مندانہ کارروائی کی بدولت ایک بہت بڑا دہشت گردی کا منصوبہ کامیابی سے ناکام بنا دیا گیا ہے۔ یہ واقعہ حکومتِ بلوچستان کی دہشت گردی کے خلاف جاری جنگ میں عوامی سطح پر بھرپور تائید اور عزمِ صمیم کا روشن مظہر ہے۔