پنکی کے 869 موبائل نمبرز، افریقی شہری بھی منشیات فروشی میں ملوث ہیں: ایڈیشنل آئی جی سندھ
Web Desk
15 May 2026
ایڈیشنل آئی جی کراچی آزاد خان نے سینٹرل پولیس آفس میں اہم پریس کانفرنس کرتے ہوئے منشیات فروشی کے بڑے نیٹ ورک کی سرغنہ انمول عرف پنکی کی گرفتاری اور اس سے جڑے چونکا دینے والے حقائق سے پردہ اٹھا دیا ہے۔ پریس کانفرنس میں ڈی آئی جی کرائم عامر فاروقی، ڈی آئی جی ویسٹ عرفان بلوچ، ڈی آئی جی اسپیشل برانچ شیراز نذیر اور ایس ایس پی سی ٹی ڈی عرفان بہادر سمیت دیگر اعلیٰ افسران بھی موجود تھے۔
ایڈیشنل آئی جی آزاد خان نے بتایا کہ ملزمہ پنکی کی گرفتاری کے وقت اس کے قبضے سے ڈیڑھ کلو کوکین اور ایک نائن ایم ایم پستول برآمد ہوا، جس پر تھانہ گارڈن میں مقدمہ درج کر کے اسے عدالت میں پیش کیا گیا۔ ملزمہ 2014 سے اس مکروہ دھندے میں ملوث ہے اور 2018 سے کراچی میں سرگرم تھی، تاہم جب وہ پولیس کے رڈار پر آئی تو لاہور فرار ہو گئی تھی۔
پولیس چیف نے انکشاف کیا کہ ملزمہ کے فون سے 869 نمبرز ملے ہیں جن کی تحقیقات کی جا رہی ہیں۔ پنکی کا نیٹ ورک بین الاقوامی سطح تک پھیلا ہوا ہے اور اس کے سہولت کار بیرون ملک بھی موجود ہیں۔ ملزمہ کے پاس 9 رائیڈرز تھے، جن میں سے 8 کا تعلق پنجاب اور ایک کا کراچی سے ہے۔ پولیس نے کارروائی کرتے ہوئے چار اہم نام ایگزٹ کنٹرول لسٹ (ECL) میں ڈالنے کے لیے بھیج دیے ہیں۔
پنکی پر قتل کا مقدمہ بھی درج کیا گیا ہے۔ یہ مقدمہ ایک نشے کے عادی شخص کی ہلاکت کے بعد درج ہوا، جس کے فون سے ملزمہ کا نمبر برآمد ہوا تھا۔ پولیس چیف نے واضح کیا کہ انمول (پنکی) جس جس کا نام لے رہی ہے، پولیس اس کی مکمل تصدیق کرے گی اور ملوث افراد کو منظر عام پر لایا جائے گا۔ تاہم، انہوں نے تاکید کی کہ بغیر ثبوت کسی کی کردار کشی نہ کی جائے۔ کیس کی گہرائی کو دیکھتے ہوئے سی ٹی ڈی (CTD) کو فنانشل کرائمز کے معاملات سونپے گئے ہیں، جبکہ ایف آئی اے (FIA) منی لانڈرنگ کے پہلوؤں پر تحقیقات کرے گی۔ ملزمہ کے متعدد بینک اکاؤنٹس سامنے آئے ہیں جن کی چھان بین جاری ہے۔
ایڈیشنل آئی جی نے مزید کہا کہ سوشل میڈیا پر ملزمہ کی پیشی اور ریکوری کی ویڈیوز وائرل کرنے والوں کے خلاف بھی قانونی کارروائی کی جائے گی۔ انہوں نے عزم ظاہر کیا کہ اس نیٹ ورک میں ملوث ہر شخص کے خلاف بلاامتیاز سخت کارروائی عمل میں لائی جائے گی اور اس سلسلے میں پنجاب پولیس اور اے این ایف (ANF) سے بھی رابطہ قائم کر لیا گیا ہے۔
متعلقہ عنوانات
روس، چین اور امریکا کا سہ فریقی اجلاس سفارت کاری کی تاریخ کا نیا باب ہے، پیوٹن
19 November 2026
کراچی کیلئے مزید 500 بسوں کی منظوری، ریلیوں کی اجازت نہیں دینگے: شرجیل میمن
19 November 2026
بھارتی پروازوں کیلئے پاکستانی فضائی حدود کی بندش میں توسیع، نوٹم جاری
19 November 2026
ربیعہ احسن قتل کیس میں اہم پیشرفت، اہل خانہ نے ملزم کو معاف کر دیا
19 November 2026
ڈیفنس میں 11 سالہ گھریلو ملازم پر تشدد، گرم چائے کی پتیلی الٹ دی گئی
19 November 2026
روہنگیا میں مسلمانوں کو قتل عام اور جنسی تشدد کا نشانہ بنایا گیا،عالمی عدالت انصاف
19 November 2026
سٹاک مارکیٹ میں تیزی، کاروبار کا مثبت رجحان رہا
19 November 2026
جے یو آئی رہنماؤں کے خلاف مقدمہ، مفتی ابرار احمد کو وارنٹ کی تعمیل کروا دی
19 November 2026