کراچی میں کتوں کے کاٹنے کے واقعات میں اضافہ ہوا,مرتضیٰ وہاب

ایڈمنسٹریٹر کراچی و میئر کراچی مرتضیٰ وہاب نے کراچی چڑیا گھر میں افتتاحی تقریب سے خطاب کرتے ہوئے شہر میں آوارہ کتوں کے کاٹنے کے بڑھتے ہوئے واقعات، پارکنگ فیس اور ترقیاتی منصوبوں سے متعلق مختلف امور پر کھل کر اظہارِ خیال کیا۔

مرتضیٰ وہاب نے کہا کہ کراچی میں کتوں کے کاٹنے کے واقعات میں اضافہ ہوا ہے اور یہ ایک سنجیدہ انسانی مسئلہ ہے۔ انہوں نے کہا کہ جب کے ایم سی آوارہ کتوں کے خلاف کارروائی کرتی ہے تو ڈاگ لورز کی جانب سے تنقید کی جاتی ہے، جبکہ جن والدین کے بچوں کو کتوں نے کاٹا ہے وہ چاہتے ہیں کہ ان کتوں کو مارا جائے۔ ان کا کہنا تھا کہ ایسے حالات میں جو بھی فیصلہ کیا جائے، اس پر تنقید کا سامنا کرنا پڑتا ہے۔

میئر کراچی نے کہا کہ وہ کام کرنے کے لیے تیار ہیں، مگر انہیں علم ہے کہ ہر اقدام کے بعد ان کے خلاف پریس کانفرنسز کی جائیں گی۔ انہوں نے کہا کہ وزیراعلیٰ سندھ کی جانب سے ریڈ لائنز کے حوالے سے ایک فیصلہ کیا گیا تھا اور جولائی کی جو ٹائم لائن دی گئی ہے، اس پر کام مکمل کروانے کے لیے وہ مسلسل زور دے رہے ہیں۔

مرتضیٰ وہاب نے واضح کیا کہ وہ تنقید سے گھبراتے نہیں اور ان کا ماننا ہے کہ طاقت کا اصل سرچشمہ عوام ہیں۔ انہوں نے کہا کہ کراچی کی بہتری کے لیے جو بھی ممکن ہوا کیا جائے گا، چاہے اس پر کتنا ہی دباؤ یا مخالفت کیوں نہ ہو۔

پارکنگ فیس کے معاملے پر بات کرتے ہوئے مرتضیٰ وہاب نے کہا کہ سندھ حکومت اور کے ایم سی نے پارکنگ فیس ختم کر دی ہے، تاہم اس کے باوجود مختلف علاقوں میں ٹاؤن انتظامیہ کی جانب سے غیر قانونی طور پر پارکنگ فیس وصول کی جا رہی ہے۔ انہوں نے کہا کہ زینب مارکیٹ، طارق روڈ اور دیگر علاقوں میں ٹاؤنز والے شہریوں سے پیسے لے رہے ہیں، جو کسی صورت قابلِ قبول نہیں۔

میئر کراچی نے شہریوں سے اپیل کی کہ وہ پارکنگ کے نام پر ایک روپیہ بھی ادا نہ کریں اور اگر کہیں غیر قانونی وصولی ہو رہی ہو تو اس کی نشاندہی کریں۔ ان کا کہنا تھا کہ کراچی کے عوام کے حقوق کا تحفظ ان کی اولین ترجیح ہے اور اس سلسلے میں کسی قسم کی کوتاہی برداشت نہیں کی جائے گی۔