رنویر سنگھ کا 2 سال بعد ’ڈان 3‘ میں کام کرنے سے انکار

بھارتی میڈیا نے دعویٰ کیا ہے کہ بالی وڈ اداکار رنویر سنگھ نے معروف فلمی سیریز کی اگلی فلم ’ڈان 3‘ میں کام کرنے سے انکار کر دیا ہے۔

یاد رہے کہ 2023 میں اداکار، ہدایتکار اور پروڈیوسر فرحان اختر نے ’ڈان 3‘ کا اعلان کرتے ہوئے بتایا تھا کہ اس بار شاہ رخ خان کی جگہ رنویر سنگھ ڈان کے کردار میں نظر آئیں گے۔ فرحان اختر نے سوشل میڈیا پلیٹ فارم ایکس پر بھی اس بات کی تصدیق کی تھی اور فلم کی شوٹنگ جلد شروع ہونے کا عندیہ دیا تھا۔

تاہم فلم کے اعلان کے تقریباً دو سال بعد اب رنویر سنگھ کے فلم چھوڑنے کی خبریں سامنے آ رہی ہیں۔ بھارتی میڈیا رپورٹس کے مطابق قریبی ذرائع کا کہنا ہے کہ فلم ’دھریندر‘ کی شاندار کامیابی کے بعد رنویر سنگھ سنجے لیلا بھنسالی اور لوکیش کنگراج جیسے فلم سازوں کے ساتھ کام کے خواہشمند ہیں اور وہ مسلسل گینگسٹر کردار ادا نہیں کرنا چاہتے۔

رپورٹس میں یہ بھی کہا گیا ہے کہ ’دھریندر‘ کی ریلیز کے فوراً بعد ’ڈان 3‘ کی شوٹنگ شروع ہونا تھی، تاہم موجودہ صورتحال کے باعث فلم کو فی الحال مؤخر کر دیا گیا ہے، جبکہ رنویر سنگھ نے اپنے دیگر منصوبوں کو ترجیح دینے کا فیصلہ کیا ہے۔

واضح رہے کہ تاحال رنویر سنگھ یا فلم کے پروڈیوسرز کی جانب سے اس معاملے پر کوئی باضابطہ بیان سامنے نہیں آیا ہے