یامی گوتم نے ’دھرندھر 2‘ میں مختصر کردار کےلیے بھاری معاوضہ ملنے کی حقیقت بتادی

بالی ووڈ کی معروف اداکارہ یامی گوتم (Yami Gautam) نے اپنی بلاک بسٹر فلم ’دھرندھر: دی ریوینج‘ (Dhurandhar: The Revenge) میں اپنے مختصر کردار کے لیے ملنے والے بھاری معاوضے سے متعلق گردش کرنے والی تمام قیاس آرائیوں اور خبروں کی تردید کرتے ہوئے ان کی حقیقت واضح کر دی ہے۔

مراٹھی کوئز شو ’کون ہو نار کروڑپتی‘ میں اپنی نئی فلم ’نئی نویلی‘ کی تشہیر کے دوران گفتگو کرتے ہوئے، شو کی میزبان اور لیجنڈری اداکارہ مادھوری ڈکشٹ نے یامی سے سوال کیا کہ کیا انہیں شوہر اور ہدایت کار آدتیہ دھر کی اس فلم میں خصوصی شرکت (Cameo) کے لیے بھاری معاوضہ دیا گیا تھا۔ اس پر یامی گوتم نے حیرت کا اظہار کرتے ہوئے بتایا کہ انہوں نے بھی کہیں پڑھا تھا کہ انہیں اس چھوٹے کردار کے لیے بہت بڑی رقم کا چیک ملا ہے، لیکن یہ سب افواہیں ہیں۔

اداکارہ کا کہنا تھا کہ کچھ چیزیں ایسی ہوتی ہیں جن کی قیمت نہیں لگائی جا سکتی۔ آدتیہ دھر نے ان سے فلم میں خصوصی طور پر آنے کی درخواست اس لیے کی تھی تاکہ وہ ان کے لیے خوش بختی کا باعث بنیں اور اسکرین پر ایک یادگار تاثر چھوڑیں۔ یامی نے واضح کیا کہ شوہر اور ایک بہترین ہدایت کار کی ہدایت کاری میں کام کرنا ہی ان کے لیے سب سے بڑا معاوضہ اور کسی بھی رقم سے زیادہ قیمتی ہے۔ واضح رہے کہ آدتیہ دھر کی ہدایت کاری میں بننے والی اس ایکشن تھرلر فلم میں رنویر سنگھ، سنجے دت اور ارجن رامپال سمیت دیگر نامور اداکار شامل ہیں، جبکہ یامی گوتم کی نئی فلم ’نئی نویلی‘ حال ہی میں سینما گھروں میں نمائش کے لیے پیش کی گئی ہے۔