عمران عباس نے شوبز انڈسٹری سے دوری کی اصل وجہ بتادی

پاکستان شوبز انڈسٹری کے معروف، خوبرو اداکار و ماڈل عمران عباس نے ڈراما انڈسٹری سے مکمل کنارہ کشی اختیار کرتے ہوئے کاروبار اور فلاحی کاموں کی دنیا میں قدم رکھ دیا ہے۔

حال ہی میں اداکار عمران عباس نے ایک نجی ٹی وی کے پروگرام میں بذریعہ ٹیلی فون شرکت کی، جس کی میزبان مشی خان تھیں۔ گفتگو کے دوران عمران عباس نے اداکاری سے دوری اختیار کرنے کی اصل وجہ بتاتے ہوئے انکشاف کیا کہ وہ پچھلے دو سے تین سالوں سے ٹی وی ڈراموں میں کام نہیں کر رہے اور اب انہوں نے شوبز کو خیرباد کہہ دیا ہے۔

سابقہ اداکار نے بتایا کہ وہ بنیادی طور پر ایک آرکیٹیکٹ ہیں اور اب اسلام آباد میں رئیل اسٹیٹ اور تعمیراتی شعبے سے منسلک ہو چکے ہیں۔ انہوں نے بتایا کہ وہ اس وقت اسلام آباد ایئرپورٹ کے قریب ایک بڑا ٹاور تعمیر کر رہے ہیں، جو تقریباً ڈھائی سال کی مدت میں مکمل ہوگا اور وہ اپنا تمام تر وقت اسی منصوبے کو دے رہے ہیں۔ عمران عباس نے مزید کہا کہ وہ اب فلاحی کاموں پر بھی توجہ مرکوز کر رہے ہیں تاکہ وہ آخرت کے لیے کوئی اچھا عمل کر سکیں، کیونکہ ان کے والدین کا انتقال ہو چکا ہے اور ان کی اپنی کوئی اولاد نہیں ہے۔