یورپ پرتشدد مظاہروں کی لپیٹ میں آ گیا، فرانس، اٹلی، البانیہ، پرتگال میں جلاؤ گھیراؤ

یورپ کے مختلف ممالک میں بڑھتی ہوئی مہنگائی، بجلی اور پیٹرولیم مصنوعات کی قیمتوں میں اضافے، ہاؤسنگ بحران اور تعلیمی مسائل کے خلاف جاری احتجاجی مظاہروں نے شدت اختیار کر لی ہے، جس کے نتیجے میں فرانس، اٹلی اور البانیہ میں پولیس اور مظاہرین کے درمیان شدید جھڑپیں ہوئیں۔ فرانسیسی وزارتِ داخلہ کے مطابق ملک بھر میں تقریباً 5 لاکھ 50 ہزار افراد سڑکوں پر نکل آئے جہاں توڑ پھوڑ اور آتش زنی کے واقعات میں سیکڑوں اہلکار زخمی اور ہزاروں افراد کو حراست میں لے لیا گیا۔ دوسری جانب البانیہ میں وزیراعظم ایڈی راما کے استعفے کے لیے ہونے والے مظاہروں کے دوران مظاہرین نے سرکاری عمارتوں کو نذرِ آتش کر دیا جبکہ اٹلی کے شہر میلان میں بھی مہنگائی اور جنگ کے خلاف احتجاج پرتشدد شکل اختیار کر گیا۔ پرتگال، اسپین اور یونان سمیت دیگر یورپی ممالک میں بھی ہاؤسنگ بحران، کرایوں میں اضافے اور معاشی دباؤ کے خلاف عوامی احتجاج کا سلسلہ جاری ہے۔