آسٹرین ایئر لائنز کی پرواز میں بم کی اطلاع، طیارے کی بلغاریہ میں ہنگامی لینڈنگ

اسرائیلی شہر تل ابیب سے آسٹریا کے دارالحکومت ویانا جانے والی آسٹرین ایئر لائنز کی پرواز میں بم کی اطلاع پر طیارے نے بلغاریہ کے صوفیہ ایئرپورٹ پر ہنگامی لینڈنگ کی ہے۔ پرواز میں اقوامِ متحدہ میں تقریر کے لیے جانے والا نوجوانوں کا ایک وفد بھی سوار تھا، جب 36 ہزار فٹ کی بلندی پر عملے کو طیارے میں مشکوک شے یا بم کی موجودگی کی اطلاع ملی۔ ایمرجنسی کوڈ جاری کرتے ہوئے طیارے کا رخ بلغاریہ کی طرف موڑ دیا گیا جہاں لینڈنگ کے فوراً بعد سیکیورٹی فورسز نے جہاز کو گھیرے میں لے لیا۔ حفاظتی پروٹوکول کے تحت مسافروں، سامان اور طیارے کی مکمل تلاشی لی گئی، تاہم کسی قسم کا دھماکہ خیز مواد برآمد نہیں ہوا۔