امارات کی جانب سے غزہ میں 60 ٹرکوں پر مشتمل امدادی سامان پہنچا دیا گیا

متحدہ عرب امارات (UAE) کی جانب سے جاری انسانی ہمدردی کے امدادی آپریشن ’نائٹ آف نائٹ 3‘ کے تحت غزہ کے متاثرہ عوام کے لیے 60 ٹرکوں پر مشتمل امدادی کھیپ کامیابی کے ساتھ پہنچا دی گئی ہے، جس میں خوراک اور عارضی پناہ گاہوں کا ضروری سامان شامل ہے۔

اماراتی خبر رساں ایجنسی کے مطابق یہ امدادی سامان مصر کے سرحدی شہر العریش میں قائم خصوصی اماراتی لاجسٹک مرکز میں تیار کیا گیا تھا، جہاں سے اسے قطعی پروٹوکول کے تحت غزہ منتقل کیا گیا۔ اس تازہ کھیپ کے بعد مذکورہ آپریشن کے تحت غزہ پہنچنے والے کل امدادی ٹرکوں کی مجموعی تعداد 14 ہزار 579 ہو گئی ہے، جبکہ یو اے ای کی جانب سے اب تک غزہ کے جنگ زدہ عوام کے لیے مجموعی طور پر ایک لاکھ 38 ہزار 30 ٹن امدادی سامان فراہم کیا جا چکا ہے۔

واضح رہے کہ 2023ء کے اواخر میں شروع ہونے والی تباہ کن جنگ کے بعد سے اب تک غزہ میں تقریباً 20 لاکھ فلسطینی بے گھر ہو چکے ہیں جبکہ شہداء کی تعداد 74 ہزار سے تجاوز کر چکی ہے۔ مسلسل بمباری کے نتیجے میں غزہ کا صحت، تعلیم اور مواصلات سمیت تمام اہم بنیادی ڈھانچہ مکمل طور پر تباہ ہو چکا ہے، اور ایسے کٹھن حالات میں اماراتی امداد متاثرہ خاندانوں کے لیے ایک بڑا سہارا بنی ہوئی ہے۔