دنیا میں 7 نہیں 6 براعظم ہیں، برطانوی محقق کا دعویٰ

برطانیہ کی ڈربی یونیورسٹی سے منسلک معروف ارضیات داں ڈاکٹر جارڈن فیتھیان اور ان کی ٹیم نے اپنی جدید تحقیق کی بنیاد پر یہ حیرت انگیز دعویٰ کیا ہے کہ شمالی امریکہ اور یوریشیا (یورپ و روس) ارضیاتی لحاظ سے اب بھی ایک ہی براعظم کا حصہ ہیں۔ محققین نے بحرِ اوقیانوس کے نیچے گرین لینڈ سے آئس لینڈ اور اسکاٹ لینڈ تک پھیلے 2,000 کلومیٹر طویل زیرِ آب پہاڑی سلسلے کا تفصیلی معائنہ کیا جو شمالی امریکی اور یورشیائی پلیٹوں کے درمیان واقع ہے۔ قائم شدہ سائنسی نظریے کے مطابق یہ دونوں ٹیکٹونک پلیٹیں سوا 5 کروڑ سال قبل الگ ہو گئی تھیں، تاہم نئی دریافت سے معلوم ہوا ہے کہ اس زیرِ آب پہاڑی سلسلے میں کئی مقامات پر دونوں پلیٹیں اب بھی باہم جڑی ہوئی ہیں۔ ماہرین کے مطابق یہ شواہد ظاہر کرتے ہیں کہ جغرافیائی حد بندیوں کے باوجود ارضیاتی ساخت کے اعتبار سے یہ دونوں خطے 20 سے 25 کروڑ سال قبل موجود ‘پانگیا’ (Pangea) نامی قدیم سپر براعظم کی مانند آج بھی آپس میں منسلک ہیں۔