90 سالہ جاپانی باڈی بلڈر کی فٹنس نے دنیا کو حیران کردیا

جاپان سے تعلق رکھنے والے 90 سالہ باڈی بلڈر توشیسوکے کانازاوا نے غیر معمولی جسمانی طاقت اور فٹنس کا مظاہرہ کرتے ہوئے دنیا بھر کو ورطۂ حیرت میں ڈال دیا ہے۔

بین الاقوامی میڈیا رپورٹس کے مطابق توشیسوکے کانازاوا نے حال ہی میں جاپان ماسٹرز باڈی بلڈنگ چیمپئن شپ میں 85 سال سے زائد عمر کے کھلاڑیوں کے زمرے میں شاندار فتح حاصل کی، جس کے ساتھ ہی ان کے مجموعی قومی اعزازات کی تعداد 19 ہو گئی ہے۔ وہ اسپین کے شہر سانتا سوسانا میں منعقدہ آئی ایف بی بی (IFBB) ورلڈ فٹنس اینڈ باڈی بلڈنگ چیمپئن شپ میں بھی شریک ہوئے، جہاں انہوں نے اپنے سے کئی دہائیاں کم عمر کھلاڑیوں کا مقابلہ کر کے سب کی داد سمیٹی۔

توشیسوکے کانازاوا اپنی اس زبردست فٹنس کا راز روایتی جاپانی غذا، مکمل سبزی خوری، براؤن رائس، ناٹو، میسو سوپ اور کچے انڈوں کو قرار دیتے ہیں۔ انہوں نے زندگی میں کبھی سگریٹ یا شراب کو ہاتھ نہیں لگایا اور 90 سال کی عمر میں بھی باقاعدگی سے جم کی مشینوں پر پٹھوں کو مضبوط بنانے والی ورزشیں کرتے ہیں۔ عالمی ادارۂ صحت (WHO) کے مطابق 65 سال سے زائد عمر کے افراد کے لیے ہفتے میں کم از کم دو دن مسلز بنانے والی جسمانی سرگرمیاں انتہائی مفید ثابت ہوتی ہیں۔