شارجہ بک فیئر میں جرمن فنکار کا چلتا پھرتا درخت بچوں کی توجہ کا مرکز بن گیا

متحدہ عرب امارات میں جاری 45ویں شارجہ بین الاقوامی کتاب میلے میں جرمنی کے شہر برلن سے آنے والے منفرد فنکارانہ شو ’’ووڈی دی واکنگ ٹری‘‘ (Woody the Walking Tree) نے بچوں اور بڑوں کی توجہ حاصل کر لی ہے۔

شارجہ بک اتھارٹی (SBA) کے مطابق، یہ شو زندہ مجسموں کے فن پر مبنی ہے جس میں ایک فنکار درخت کا روپ دھار کر شروعات میں ساکت رہتا ہے اور پھر اچانک میلے کی راہداریوں میں گھومنا شروع کر دیتا ہے۔ بظاہر عام دکھائی دینے والے اس چلتے پھرتے درخت، اس پر لگے رنگ برنگے پھولوں، پرندوں اور دلچسپ آوازوں نے زائرین کو حیران و مسرور کر دیا۔ بچے اس منفرد کردار کے ساتھ یادگاری تصاویر بھی بنوا رہے ہیں۔

منتظمین کے مطابق اس شو کا مقصد محض تفریح فراہم کرنا نہیں بلکہ فن اور تخیل کے امتزاج سے بچوں میں قدرتی ماحول، درختوں اور جانداروں کی اہمیت و محبت اجاگر کرنا ہے۔ واضح رہے کہ شارجہ بین الاقوامی کتاب میلہ 15 نومبر تک جاری رہے گا، جہاں زائرین کے لیے علمی و ثقافتی سرگرمیوں کا سلسلہ جاری ہے۔