پاکستان میں انتظامی یونٹس بنانے کے حوالے سے غور کرنا چاہئے: خواجہ آصف

وفاقی وزیرِ دفاع خواجہ آصف نے ملک میں آبادی کے بے تحاشا اضافے کے پیشِ نظر نئے انتظامی یونٹس بنانے اور اختیارات کو صوبائی دارالحکومتوں سے مقامی سطح پر منتقل کرنے کی ضرورت پر زور دیا ہے۔ ایک نجی ٹی وی چینل کو انٹرویو دیتے ہوئے وزیرِ دفاع نے کہا کہ دنیا کے متعدد ممالک میں عوامی سہولیات کی بہتری کے لیے نئے یونٹس تشکیل دیے جاتے ہیں، اسی طرح پاکستان میں بھی اس پر غور ہونا چاہیے۔ انہوں نے واضح کیا کہ طاقت کا ارتکاز صرف لاہور، کراچی، کوئٹہ اور پشاور تک محدود نہیں رہنا چاہیے بلکہ صوبائی اختیارات اور مرکز سے ملنے والے فنڈز کی اصل منزل بلدیاتی ادارے ہونے چاہئیں۔ خواجہ آصف نے سیاسی قیادت کے طرزِ عمل پر تنقید کرتے ہوئے کہا کہ اگر ملک میں 12 انتظامی یونٹس بنانے کی تجاویز ہیں تو ان پر عمل کیا جائے، تاہم ان نئے یونٹس کی تشکیل میں لسانی، نسلی یا سیاسی مفادات کے بجائے محض انتظامی بنیادوں کو مدِ نظر رکھا جانا چاہیے۔