صدر پوتن کی امریکہ میں جی 20 سربراہی اجلاس میں شرکت کا فیصلہ نہیں ہوا: کریملن

روسی صدارتی محل کریملن نے واضح کیا ہے کہ امریکی ریاست فلوریڈا میں منعقد ہونے والے جی 20 سربراہی اجلاس میں صدر ولادیمیر پوتن کی ذاتی شرکت کے حوالے سے تاحال کوئی حتمی فیصلہ نہیں کیا گیا۔ کریملن کے ترجمان دمتری پیسکوف نے صدر پوتن کے ممکنہ دورۂ امریکہ کے متعلق قبل از وقت قیاس آرائیوں سے گریز کی ہدایت کرتے ہوئے کہا کہ اس نوعیت کے بین الاقوامی دوروں کی لاجسٹک، انتظامی اور سفری ترتیب انتہائی پیچیدہ ہوتی ہے۔ دمتری پیسکوف کا یہ محتاط ردعمل شینزن میں امریکہ و چین کے صدور سے ممکنہ ملاقات کے بعد فلوریڈا میں ڈونلڈ ٹرمپ کی جانب سے پوتن کی دعوت قبول کرنے سے متعلق پوچھے گئے سوال کے جواب میں سامنے آیا۔ واضح رہے کہ آئندہ جی 20 سربراہی اجلاس 14 اور 15 دسمبر کو میامی کے قریب ڈورل میں ہوگا، جہاں امریکی صدر ڈونلڈ ٹرمپ پوتن کو اجلاس میں دیکھنے کی خواہش کا اظہار کر چکے ہیں، تاہم کریملن کے مطابق ماسکو کی جانب سے اس معاملے پر فی الحال کوئی باضابطہ فیصلہ سامنے نہیں آیا ہے۔