مرغیاں کھا کھا کر باز موٹی، ماہرین نے ڈائٹ شروع کروا دی

امریکی ریاست ورجینیا میں ایک باز کے اڑنے سے قاصر ہونے کی ایسی عجیب و غریب اور دلچسپ وجہ سامنے آئی ہے جس نے وائلڈ لائف ماہرین اور ڈاکٹروں کو بھی حیران و ششدر کر دیا ہے۔

غیر ملکی میڈیا کی رپورٹ کے مطابق، ورجینیا کے شہر روانوک (Roanoke) میں ایک خاتون کو اپنے گھر کے صحن میں ایک مادہ باز زمین پر ساکت بیٹھی نظر آئی، جو کئی بار کوشش کے باوجود پرواز کرنے میں بالکل ناکام رہی۔ خاتون کی اطلاع پر جنگلی حیات کے تحفظ کے مرکز (Wildlife Center) کی ریسکیو ٹیم نے موقع پر پہنچ کر باز کو طبی معائنے کے لیے اسپتال منتقل کر دیا۔

ابتدائی ایکسرے اور تفصیلی معائنے کے بعد ماہرین نے تصدیق کی کہ پرندے کے پروں، ہڈیوں یا آنکھوں میں کسی قسم کی چوٹ یا بیماری کا کوئی نشان نہیں ہے۔ مزید تحقیق پر معلوم ہوا کہ باز کا وزن غیر معمولی حد تک بڑھ چکا ہے جس کی وجہ سے وہ اڑنے کے قابل نہیں رہی۔ ماہرین کے مطابق مادہ باز کا وزن تقریباً 2 پاؤنڈ ریکارڈ کیا گیا، جو اس نسل کے پرندوں کے اوسط وزن سے تقریباً ایک پاؤنڈ زیادہ ہے۔ بعد ازاں انکشاف ہوا کہ یہ باز قریبی پڑوسی کی مرغیوں کا بلا ناغہ شکار کر کے مسلسل پیٹ بھرتی رہی تھی، جس سے جسمانی مشقت کے بغیر اس کے وزن میں بے پناہ اضافہ ہو گیا۔ وائلڈ لائف ماہرین نے اب باز کو خصوصی ڈائیٹ پر رکھ دیا ہے تاکہ وزن کم ہونے پر اسے دوبارہ فضا میں آزاد کیا جا سکے۔