پاکستان پوسٹ میں غیر قانونی بھرتیوں کا کیس، اسعد محمود تفتیش سے روپوش قرار

جمعیت علمائے اسلام (ف) کے سینئر رہنما اسعد محمود کے گرد پاکستان پوسٹ میں غیر قانونی بھرتیوں اور کرپشن سے متعلق کیسز میں قانونی گھیرا تنگ ہونے لگا ہے۔ فیڈرل انویسٹی گیشن ایجنسی (ایف آئی اے) نے بارہا قانونی طلبی کے باوجود پیش نہ ہونے پر اسعد محمود کو دانستہ ڈیفالٹر اور تفتیش سے روپوش قرار دے دیا ہے۔ ایف آئی اے اینٹی کرپشن سرکل نے ان کا نام پاسپورٹ کنٹرول لسٹ (PNIL) اور اسٹاپ لسٹ میں شامل کرنے کی سفارش کے ساتھ ساتھ جاری انکوائری کو باقاعدہ مقدمے میں تبدیل کر کے مختلف قانونی دفعات کے تحت ایف آئی آر درج کرنے کی تجویز دی ہے۔ حکام کے مطابق اسعد محمود کو 2 نومبر کو تحقیقات کے لیے طلب کیا گیا تھا، تاہم ان کی عدم پیشی پر یہ اقدام اٹھایا گیا۔ واضح رہے کہ جے یو آئی (ف) کے سربراہ مولانا فضل الرحمان اور اسعد محمود سمیت دیگر رہنماؤں کے خلاف مختلف مقدمات میں قانونی کارروائیاں جاری ہیں