فضائی آلودگی میں لاہور دنیا کے آلودہ ترین شہروں میں سرفہرست

صوبائی دارالحکومت لاہور ایک بار پھر دنیا کے آلودہ ترین شہروں میں سرفہرست آ گیا ہے، جہاں عالمی ماحولیاتی ویب سائٹ کے مطابق فضا میں آلودگی کا ایئر کوالٹی انڈیکس (AQI) 292 پرٹیکولیٹ میٹر ریکارڈ کیا گیا۔ پنجاب کے دیگر شہروں میں بھی فضائی معیار انتہائی تشویش ناک رہا، جہاں ننکانہ صاحب میں آلودگی کی سطح سب سے زیادہ 685 اور ڈیرہ غازی خان میں 611 تک جا پہنچی، جبکہ جھنگ میں 498، ملتان میں 382، سرگودھا میں 363، فیصل آباد میں 323 اور گوجرانوالہ میں 296 پرٹیکولیٹ میٹر ریکارڈ کی گئی۔ محکمہ موسمیات کے مطابق لاہور میں ہوا کی رفتار دو کلومیٹر فی گھنٹہ اور نمی کا تناسب 67 فیصد رہنے کے باعث اسموگ کا گھیراؤ برقرار ہے جبکہ درجہ حرارت 16 سے 29 ڈگری سینٹی گریڈ کے درمیان رہنے کا امکان ہے۔ شدید آلودگی کے پیشِ نظر ماہرینِ صحت نے شہریوں، بالخصوص بچوں، بزرگوں اور سانس کے مریضوں کو غیر ضروری نقل و حرکت سے گریز کرنے، کھلی فضا میں ورزش نہ کرنے اور باہر نکلتے وقت ماسک لازمی استعمال کرنے کی ہدایت کی ہے۔