گلوکارہ حمیرا ارشد دمام، ریاض اور جدہ میں فن کا مظاہرہ کریں گی

معروف پاکستانی گلوکارہ حمیرا ارشد سعودی عرب پہنچ گئی ہیں، جہاں دمام، ریاض اور جدہ میں ان کے علاوہ ذیشان روکھڑی اور دیگر نامور پاکستانی فنکار اپنے فن کا مظاہرہ کریں گے۔

دمام ایئرپورٹ پر آمد کے بعد میڈیا سے گفتگو کرتے ہوئے حمیرا ارشد کا کہنا تھا کہ بیرون ملک مقیم پاکستانیوں کی بے پناہ محبت اور چاہت ہی انہیں کھینچ کر سعودی عرب لائی ہے، کیونکہ تارکینِ وطن اپنے وطنِ عزیز سے انتہائی گہری محبت اور قلبی وابستگی رکھتے ہیں۔

معروف گلوکارہ نے اس عزم کا اظہار کیا کہ بیرون ملک رہنے والا ہر پاکستانی اپنے ملک کا سفیر ہے، اس لیے ہم سب کی یہ ذمے داری بنتی ہے کہ ہم اپنے بہترین کردار، اچھے رویے اور اخلاق کے ذریعے دنیا بھر میں پاکستان کی ایک مثبت اور روشن تصویر پیش کریں تاکہ ملک کا نام مزید بلند ہو۔ واضح رہے کہ ’پاکبان‘ کے زیرِ اہتمام دمام، ریاض اور جدہ میں منعقد ہونے والے ان ثقافتی اور موسیقی کے پروگراموں میں پاکستانی فنکار شاندار پرفارمنس پیش کریں گے۔