شاہ رخ خان کی فلم ’کنگ‘ کے پوسٹر پر تنقید، وجہ کیا ہے؟

بالی ووڈ سپر اسٹار شاہ رخ خان کی آنے والی فلم ’کنگ‘ کا نیا پوسٹر جاری ہوتے ہی سوشل میڈیا پر ایک نئی بحث چھڑ گئی ہے۔ سدھارتھ آنند کی ہدایت کاری میں بننے والی اس فلم کے پوسٹر میں شاہ رخ خان ہاتھ میں بندوق تھامے شعلوں میں گھری سرنگ سے باہر آتے ہوئے ایک انتقامی روپ میں نظر آ رہے ہیں۔ پوسٹر ریلیز کے بعد سوشل میڈیا صارفین کی جانب سے دعویٰ کیا گیا کہ یہ منظر اور انداز اداکار رنویر سنگھ کی فلم ’دھرندھر: دی ریونج‘ کے پوسٹر سے مشابہت رکھتا ہے، تاہم ان الزامات کی کوئی باضابطہ تصدیق نہیں ہو سکی۔ کاپی کی تنقید کے باوجود شاہ رخ خان کے مداحوں میں فلم کو لے کر بے پناہ جوش پایا جاتا ہے اور یہ فلم 24 دسمبر 2026 کو سینما گھروں کی زینت بنے گی۔