ورزش سے دل پر مرتب ہونیوالے ایک حیرت انگیز اثر کا انکشاف

ورزش کو ہمیشہ سے ہی جسمانی اور قلبی صحت کے لیے انتہائی مفید قرار دیا جاتا ہے، تاہم برطانیہ کی برسٹل یونیورسٹی میں ہونے والی ایک نئی طبی تحقیق نے انکشاف کیا ہے کہ ورزش نہ صرف دل کو مضبوط بناتی ہے بلکہ دل کے پٹھوں کی ساخت پر اس کے اثرات توقع سے کہیں زیادہ حیران کن ہوتے ہیں۔

تحقیق کے مطابق معتدل ایروبک ورزشیں (جیسے تیز چہل قدمی، دوڑنا، تیراکی اور سائیکل چلانا) کرنے سے دل کے ان پٹھوں کے خلیات کے اسٹرکچر میں نمایاں تبدیلیاں آتی ہیں جو دل کی سرگرمیوں کو خودکار طور پر ریگولیٹ کرتے ہیں۔ سب سے زیادہ حیران کن بات یہ ہے کہ یہ مثبت تبدیلیاں دل کے دائیں اور بائیں دونوں حصوں میں یکساں نہیں بلکہ ڈرامائی حد تک مختلف ہوتی ہیں۔ چوہوں پر کیے گئے 10 ہفتوں کے تجربات سے یہ بات سامنے آئی کہ ورزش کے نتیجے میں دل کے دائیں حصے میں متعلقہ خلیات کی تعداد بائیں جانب کے مقابلے میں چار گنا زیادہ پائی گئی۔ ماہرین کے مطابق اس سے یہ واضح ہوتا ہے کہ ورزش دل کے پٹھوں پر یکساں اثر انداز ہونے کے بجائے دونوں اطراف میں مخصوص اور الگ الگ تبدیلیاں لاتی ہے، جو دل کو صحت مند رکھنے میں مددگار ثابت ہوتی ہیں۔ اس تحقیق کے نتائج معروف سائنسی جریدے ‘آٹونومک نیورو سائنس’ میں شائع ہوئے ہیں، جبکہ محققین اب ان نتائج کی انسانی جسم پر مکمل تصدیق کے لیے مزید طبی تجربات کی منصوبہ بندی کر رہے ہیں۔