معلومات کے تبادلے کےلیے چین پاکستان انفارمیشن کوریڈور کا باضابطہ آغاز

پاکستان اور چین کے درمیان سفارتی تعلقات کے قیام کے 75 سال مکمل ہونے کے تاریخی سلسلے میں اسلام آباد میں باضابطہ طور پر ‘چین پاکستان انفارمیشن کوریڈور’ کا آغاز کر دیا گیا ہے۔

اس سلسلے میں منعقدہ پروقار تقریب میں وفاقی وزیر اطلاعات و نشریات عطا اللہ تارڑ، پاکستان میں چین کے سفیر جیانگ زیڈونگ، چینی وزارت خارجہ کی ترجمان ماؤ ننگ اور دیگر اعلیٰ سرکاری حکام نے شرکت کی۔ اس انفارمیشن کوریڈور کا بنیادی مقصد دونوں برادر ممالک کے مابین ذرائع ابلاغ کے شعبے میں تعاون کو فروغ دینا، معلومات کے دو طرفہ تبادلے کو بہتر بنانا اور غلط خبروں و گمراہ کن پروپیگنڈے کی روک تھام کے لیے مشترکہ کوششیں کرنا ہے۔ تقریب سے خطاب کرتے ہوئے وفاقی وزیر اطلاعات عطا اللہ تارڑ نے کہا کہ یہ کوریڈور پاکستان اور چین کے عوام کے دل و دماغ جوڑنے کا ایک مضبوط پل ثابت ہوگا، جو میڈیا اور ڈیجیٹل پلیٹ فارمز کے ذریعے دونوں قوموں کو مزید قریب لائے گا۔ انہوں نے اس عزم کا اعادہ کیا کہ پاک چین دوستی ہر آزمائش میں پورا اتر کر آہنی بھائی چارے کی ایک منفرد مثال بن چکی ہے، جسے اب ڈیجیٹل ذرائع سے مزید وسعت دینی ہے۔

چینی سفیر جیانگ زیڈونگ نے اس موقع پر مبارکباد دیتے ہوئے کہا کہ اس اہم اقدام سے دونوں ممالک کے عوام کو ایک دوسرے کی ثقافت اور روایات کو بہتر طور پر سمجھنے میں مدد ملے گی، جبکہ یہ منصوبہ گمراہ کن معلومات کا مؤثر انداز میں مقابلہ کرنے میں بھی معاون ثابت ہوگا۔