ادویات کی قیمتوں میں بلاجواز اضافہ قابلِ قبول نہیں: احد چیمہ

وفاقی وزیرِ اقتصادی امور احد چیمہ نے ادویات کی قیمتوں میں کسی بھی قسم کے بلاجواز اضافے کو ناقابلِ قبول قرار دیتے ہوئے قیمتوں کے تعین میں عوامی مفاد کو مقدم رکھنے کی ہدایت کی ہے۔ ڈرگ ریگولیٹری اتھارٹی آف پاکستان (ڈریپ) سے متعلق اسلام آباد میں منعقدہ اعلیٰ سطح کے اجلاس کی صدارت کرتے ہوئے انہوں نے زیرِ التوا کیسز پر پیشرفت اور قیمتوں کے موجودہ فارمولے پر نظرثانی کا جائزہ لیا۔ اجلاس میں ڈریپ حکام نے بریفنگ دی کہ عالمی ادارہ صحت (WHO) کی تجویز کردہ ٹرائی ویلنٹ فلو ویکسین مارکیٹ میں وافر مقدار میں دستیاب ہے اور عالمی قیمتیں کنٹرول میں ہونے پر ہارڈشپ کیس واپس لے لیا گیا ہے۔ احد چیمہ نے مزید تاکید کی کہ قیمتوں کے طریقہ کار میں ایسی کوئی تبدیلی نہ کی جائے جس سے فارماسیوٹیکل سیکٹر متاثر ہو، جبکہ مستند ڈیٹا بیس کی سبسکرپشنز حاصل کرنے کی بھی ہدایت کی تاکہ ڈریپ کے فیصلے باوثوق اعداد و شمار پر مبنی ہوں۔