ایران کی شرکت کے بغیر خلیج فارس میں پائیدار سلامتی ناممکن ہے: عمان

عمان کے وزیر خارجہ بدر البوسعیدی نے برطانیہ کی معروف یونیورسٹی آف کیمبرج میں ایک اہم خطاب کے دوران واضح کیا ہے کہ ایران کی فعال شرکت کے بغیر خلیج فارس کے خطے میں پائیدار اور حقیقی سلامتی کا قیام ہرگز ممکن نہیں۔

عمانی وزیر خارجہ نے زور دیا کہ خطے کے ممالک کو اپنی سلامتی کے امور کی ذمہ داری خود اپنے ہاتھوں میں لینی چاہئے۔ انہوں نے اس بات پر افسوس کا اظہار کیا کہ اب تک ایران کو علاقائی سلامتی کے تمام تر انتظامات سے باہر رکھنے کی وجہ سے پورے خطے کو بھاری نقصان اٹھانا پڑا ہے۔ بدر البوسعیدی کا کہنا تھا کہ خلیج کے خطے نے یہاں غیر ملکی فوجی دستوں، جنگی بحری بیڑوں اور فضائی دفاعی نظاموں کی غیر ضروری اور بھاری تعیناتی کی بہت بڑی اقتصادی اور سیاسی قیمت چکائی ہے، جبکہ بیرونی طاقتوں کی اس مستقل موجودگی نے علاقائی ممالک کے باہمی تعلقات میں صرف بداعتمادی اور کشیدگی کو ہی فروغ دیا ہے۔

خطے کے دیرینہ مسائل پر روشنی ڈالتے ہوئے انہوں نے مزید کہا کہ ایرانی جوہری پروگرام کا تنازع بھی دراصل بیرونی مداخلت اور غیر ضروری دباؤ کی وجہ سے اب تک حل طلب چلا آ رہا ہے۔