گوگل اور یوٹیوب کا بچوں کی آن لائن حفاظت یقینی بنانے کیلئے لاکھوں ڈالرز کا منصوبہ

گوگل اور یوٹیوب نے متحدہ عرب امارات سمیت مشرق وسطیٰ اور شمالی افریقہ (مینا) کے خطے میں بچوں کو انٹرنیٹ کے خطرات سے محفوظ رکھنے کے لیے ایک بڑے علاقائی منصوبے کا باضابطہ اعلان کر دیا ہے۔

اماراتی خبر رساں ادارے ’وام‘ کے مطابق، اس چار سالہ منصوبے کے تحت خطے کے نو ممالک میں 23 لاکھ سے زیادہ بچوں کو محفوظ انداز میں انٹرنیٹ استعمال کرنے، آن لائن دھوکہ دہی سے بچنے اور اپنی ذاتی معلومات کے تحفظ سے متعلق آگاہی فراہم کرنے کا ہدف مقرر کیا گیا ہے۔ اس مقصد کے لیے گوگل کی فلاحی تنظیم ’گوگل ڈاٹ آرگ‘ نے علاقائی تعلیمی ادارے ’انجاز العرب‘ کو 24 لاکھ امریکی ڈالر کی مالی معاونت فراہم کرنے کا اعلان کیا ہے۔ اس مہم میں متحدہ عرب امارات، سعودی عرب، مصر، مراکش اور تیونس سمیت نو ممالک شامل ہوں گے، جہاں 7 سے 13 سال کی عمر کے بچوں کو ڈیجیٹل دنیا کے ممکنہ خطرات، ذمہ دارانہ آن لائن رویوں اور حفاظت کے بنیادی اصول سکھائے جائیں گے۔ اس سلسلے میں حال ہی میں دبئی کے السرکال ایونیو میں خاندانوں اور بچوں کے لیے دو روزہ خصوصی پروگرام بھی منعقد کیا گیا، جس میں والدین کو یوٹیوب کڈز، فیملی لنک اور بچوں کی آن لائن سرگرمیوں کی مؤثر نگرانی کے طریقوں سے متعارف کرایا گیا۔

متحدہ عرب امارات کی ٹیلی کمیونیکیشنز اینڈ ڈیجیٹل گورنمنٹ ریگولیٹری اتھارٹی اور نیشنل میڈیا اتھارٹی کے تعاون سے شروع ہونے والا یہ منصوبہ والدین اور بچوں کے درمیان ڈیجیٹل شعور بیدار کرنے میں اہم کردار ادا کرے گا، تاکہ بچے مشکوک پیغامات، آن لائن فراڈ، غیر محفوظ لنکس اور ذاتی ڈیٹا کے غلط استعمال جیسے خطرات سے بروقت آگاہ رہ سکیں۔