ترکیہ کی پارلیمانی خارجہ امور کمیٹی نے مکہ مشترکہ دفاعی معاہدے کی منظوری دیدی

ترکیہ کی پارلیمانی خارجہ امور کمیٹی نے اہم پیشرفت کرتے ہوئے ‘مکہ مشترکہ دفاعی معاہدے’ کی باضابطہ منظوری دے دی ہے، جس کے بعد اب اس معاہدے کی توثیق کے آخری مرحلے کے لیے اسے ترک پارلیمنٹ میں بحث اور حتمی ووٹنگ کے لیے پیش کیا جائے گا۔

ترک نائب وزیر خارجہ نے اس موقع پر وضاحت کرتے ہوئے کہا کہ مکہ دفاعی معاہدہ کسی بھی ملک کے خلاف نہیں ہے، بلکہ اس کی نوعیت اور اہداف مکمل طور پر دفاعی ہیں۔ انہوں نے اس عزم کا اظہار کیا کہ اس معاہدے کا اصل مقصد خطے کے ممالک کے درمیان باہمی تعاون کو فروغ دینا ہے نہ کہ خطے میں نئے عسکری یا سیاسی بلاکس کی تشکیل کرنا۔ ان کا کہنا تھا کہ یہ مشترکہ دفاعی معاہدہ علاقائی سلامتی کو مستحکم بنانے اور اجتماعی دفاع کو مؤثر کرنے میں اہم کردار ادا کرے گا۔ ترک وزارت خارجہ کے اعلیٰ حکام کا اس حوالے سے مزید کہنا تھا کہ خطے کے دیرینہ مسائل کے حل کے لیے اب بیرونی قوتوں پر انحصار کرنے کے بجائے خود خطے کے ممالک کو آگے بڑھ کر اپنی سلامتی کی ذمہ داری سنبھالنی چاہئے۔