مجتبیٰ خامنہ ای کا آبنائے ہرمز پر کنٹرول برقرار رکھنے اور جنگی شرائط پر عملدرآمد پر زور

ایران کے نئے سپریم لیڈر مجتبیٰ خامنہ ای سے سپریم نیشنل سیکیورٹی کونسل کے سیکریٹری محسن رضائی نے ایک اہم ملاقات کی ہے، جس میں ملک کی مجموعی قومی سلامتی، آبنائے ہرمز کی حساس صورت حال اور ہمسایہ ممالک کے ساتھ دوطرفہ تعلقات پر تفصیلی تبادلہ خیال کیا گیا۔

ایرانی میڈیا کے مطابق ملاقات کے دوران مجتبیٰ خامنہ ای نے اس بات پر زور دیا کہ سپریم نیشنل سیکیورٹی کونسل ملکی پالیسی سازی کا ایک انتہائی اہم مرکز ہے، اس لیے یہ ضروری ہے کہ ہر شعبے میں بروقت اور درست فیصلوں کے ساتھ ساتھ مناسب عملی اقدامات بھی کیے جائیں۔ انہوں نے واضح کیا کہ آبنائے ہرمز پر مکمل کنٹرول ایران کی قومی اور علاقائی سلامتی کے تحفظ کے لیے انتہائی اہمیت کا حامل ہے، جبکہ مضبوط قومی مزاحمت کا سب سے بڑا نتیجہ دشمن کی مکمل مایوسی کی صورت میں سامنے آتا ہے۔ مجتبیٰ خامنہ ای نے اس عزم کا بھی اظہار کیا کہ جنگ کے باضابطہ خاتمے کے لیے ایرانی حکام کی جانب سے طے کردہ اور مقرر کردہ شرائط پر ہر صورت عمل درآمد کو یقینی بنایا جائے۔