پمز ہسپتال میں بچوں کی اموات، آتشزدگی واقعہ: غفلت کے الزام میں 7 افسران چارج شیٹ

اسلام آباد کے معروف پمز اسپتال میں بچوں کی اموات اور آتشزدگی کے افسوسناک واقعات کے معاملے پر سخت انکوائری کے بعد غفلت کے الزام میں سابق ایگزیکٹو ڈائریکٹر سمیت 7 اعلیٰ افسران کو باضابطہ طور پر چارج شیٹ کر دیا گیا ہے۔

دستاویزات کے مطابق سابق ایگزیکٹو ڈائریکٹر پمز ڈاکٹر رانا عمران سکندر سمیت ساتوں افسران پر اسپتال میں حفاظتی اقدامات، ہنگامی انتظامات اور فائر سیفٹی پروٹوکولز پر عمل درآمد کرانے میں سنگین ناکامی کے الزامات عائد کیے گئے ہیں۔ چارج شیٹ میں نشاندہی کی گئی ہے کہ سابق ایگزیکٹو ڈائریکٹر اور ان کے ماتحت افسران کی مبینہ غفلت کی وجہ سے جولائی اور اگست کے دوران آتشزدگی کے مختلف واقعات پیش آئے، جبکہ جولائی 2026 میں ہاسٹل میں پیش آنے والے حادثے کی انکوائری میں سامنے آنے والی خامیوں کو دور کرنے اور ایس او پیز پر عمل درآمد کرانے میں بھی غفلت برتی گئی۔

مقررہ ذمہ داریوں میں کوتاہی پر دیگر افسران کے خلاف بھی سخت کارروائی کی گئی ہے؛ جوائنٹ ایگزیکٹو ڈائریکٹر ڈاکٹر مطاہر شاہ پر نرسنگ امور اور بنیادی ڈھانچے کی نگرانی میں ناکامی کا الزام ہے، جبکہ جوائنٹ ایگزیکٹو ڈائریکٹر نان میڈیکل وارث علی رضا کے خلاف بند راستوں، ناقص وینٹیلیشن اور خراب آلات جیسے سنگین نقائص کی نشاندہی کی گئی ہے جن کی وجہ سے ہنگامی انخلا اور امدادی کارروائیوں میں شدید رکاوٹ پیدا ہوئی۔ اس کے علاوہ ڈائریکٹر ایم سی ایچ ڈاکٹر نوشیلا امجد، ڈاکٹر سعدیہ ریاض (رات کے اوقات میں عملے کی عدم دستیابی پر)، ڈاکٹر انیزہ جلیل اور ڈاکٹر نغم نواز (واقعے کے دوران ڈیوٹی اسٹیشن غیر حاضری پر) کو بھی چارج شیٹ کا سامنا ہے۔