واٹس ایپ پر انسٹاگرام ریلز شیئر کرنا ہوگا آسان، نئے فیچر کی آزمائش

مقبول ترین میسجنگ ایپ واٹس ایپ اپنے صارفین کے لیے ایک نیا اور شاندار فیچر متعارف کرانے کی تیاری کر رہا ہے، جس کے تحت صارفین اب انسٹاگرام ریلز (Instagram Reels) کو براہِ راست واٹس ایپ چیٹ میں شیئر کر سکیں گے۔

ٹیکنالوجی ویب سائٹ ‘ڈبلیو اے بیٹا انفو’ (WABetaInfo) کی رپورٹ کے مطابق واٹس ایپ کے اینڈرائیڈ بیٹا ورژن میں اٹیچمنٹ مینیو اور گیلری پکر کے لسٹ ویو کے اندر ریلز کا ایک نیا شارٹ کٹ شامل کیا جا رہا ہے۔ اس شارٹ کٹ پر کلک کرنے سے ایک نئی اسکرین کھلے گی، جہاں سے صارف اپنی پسند کی انسٹاگرام ریلز منتخب کرکے آسانی سے واٹس ایپ چیٹ میں بھیج سکے گا۔

اس فیچر کو استعمال کرنے کے لیے یہ لازمی ہوگا کہ صارف کا واٹس ایپ اکاؤنٹ ‘میٹا اکاؤنٹس سینٹر’ (Meta Accounts Center) کے ساتھ لنک ہو۔ اکاؤنٹ لنک نہ ہونے کی صورت میں میڈیا پکر کے ذریعے ریلز بھیجنے کی یہ سہولت دستیاب نہیں ہوگی۔ رپورٹ کے مطابق میڈیا پکر میں تین مختلف ٹیبز موجود ہوں گے؛ ‘ریسنٹ’ (Recent) ٹیب میں حال ہی میں دیکھی گئی ریلز، ‘سیوڈ’ (Saved) ٹیب میں محفوظ کی گئی ویڈیوز، جبکہ ‘لائیکڈ’ (Liked) ٹیب میں پسند کی گئی ریلز دکھائی جائیں گی، جن میں سے کسی بھی ویڈیو کو براہِ راست چیٹ میں شیئر کیا جا سکے گا۔