سردیوں میں صارفین کو روزانہ صرف 8 گھنٹے گیس ملنے کا امکان

سردیوں کی آمد کے ساتھ گیس کی طلب اور رسد میں بڑھتے ہوئے فرق کے باعث گھریلو صارفین کے لیے گیس کی لوڈشیڈنگ کے خدشات پیدا ہو گئے ہیں، جس کے تحت 24 گھنٹوں میں صرف 8 گھنٹے گیس کی فراہمی کی تجویز زیرِ غور ہے۔ ذرائع کے مطابق وزارتِ پٹرولیم نے گیس مینجمنٹ کا ہوم ورک مکمل کر لیا ہے اور جلد وزیراعظم کو حتمی پریزنٹیشن دی جائے گی۔ مجوزہ منصوبے کے تحت سوئی ناردرن (SNGPL) اور سوئی سدرن (SSGC) ناشتے، دوپہر اور رات کے کھانے کے اوقات میں گیس کی فراہمی کو یقینی بنائیں گی۔ اس وقت سوئی ناردرن 487 ملین مکعب فٹ جبکہ سوئی سدرن 286 ملین مکعب فٹ یومیہ گیس گھریلو صارفین کو فراہم کر رہی ہے، تاہم گیس فراہمی کے اس نئے شیڈول کی حتمی منظوری اور ایل پی جی کی قیمتوں کے ریگولیشن کا سرکاری اعلان ہونا ابھی باقی ہے۔