واٹس ایپ کا ’مینشنز اینڈ ریپلائیز‘ کے نام سے نیا فلٹر متعارف

انسٹنٹ میسجنگ ایپلی کیشن واٹس ایپ (WhatsApp) نے اپنے صارفین کی سہولت اور روزمرہ استعمال کو مزید آسان بنانے کے لیے ’مینشنز اینڈ ریپلائیز‘ (Mentions and Replies) کے نام سے ایک نیا فلٹر متعارف کرانا شروع کر دیا ہے۔ اس نئے فیچر کے ذریعے صارفین کو ایسی تمام چیٹس تلاش کرنے میں آسانی ہوگی جن میں انہیں ٹیگ (Mentions) کیا گیا ہو یا ان کے بھیجے گئے پیغامات کا جواب (Replies) دیا گیا ہو۔

‘واٹس ایپ بیٹا انفو’ (WABetaInfo) کی رپورٹ کے مطابق یہ نیا فیچر اینڈرائیڈ کے بیٹا ورژن 2.26.42.12 استعمال کرنے والے کچھ منتخب صارفین کے لیے جاری کیا جا رہا ہے۔ یہ فلٹر واٹس ایپ کی مین چیٹس ٹیب (Chats Tab) میں ہی دستیاب ہوگا، جہاں کلک کرنے پر صرف وہی گفتگو سامنے آئے گی جس میں صارف کا زکر یا جواب شامل ہو۔ اس فیچر سے خاص طور پر بڑی گروپ چیٹس اور کمیونٹیز کے ان صارفین کو بے حد فائدہ ہوگا جو زیادہ میسجز کی وجہ سے اہم سوالات یا جوابات دیکھنے سے محروم رہ جاتے تھے۔

اس فیچر کی ایک بڑی خصوصیت یہ ہے کہ موبائل سے نوٹیفکیشنز کلئیر (Clear) کرنے کے بعد بھی متعلقہ چیٹس اس فلٹر کے اندر محفوظ رہیں گی۔ صارفین اپنی پسند اور ضرورت کے مطابق سیٹنگز میں جا کر اس فلٹر کو بند کر سکتے ہیں یا اسے ‘مور’ (More) سیکشن میں منتقل کر سکتے ہیں۔ فی الحال یہ فیچر آزمائشی بنیادوں پر محدود بیٹا صارفین کو فراہم کیا جا رہا ہے، جبکہ تمام عام صارفین کے لیے اس کی باقاعدہ دستیابی کی حتمی تاریخ کا اعلان ہونا ابھی باقی ہے