مائیکرو سافٹ کی اخراجات پورے کرنے کیلئے 60 ہزار ملازموں کو ملازمت چھوڑنے کی پیشکش

ٹیکنالوجی کی دنیا کی معروف ترین کمپنی مائیکروسافٹ نے مصنوعی ذہانت (AI) کے شعبے میں بھاری سرمایہ کاری کے اخراجات پورے کرنے اور کاروباری لاگت کو کم کرنے کے لیے اپنے 60 ہزار ملازمین کو رضاکارانہ طور پر ملازمت چھوڑنے (Voluntary Separation) کی پیشکش کر دی ہے۔

کمپنی کے ذرائع کے مطابق یہ تعداد مائیکروسافٹ کی عالمی افرادی قوت کے ایک چوتھائی سے بھی زیادہ بنتی ہے۔ اس خصوصی پروگرام کے تحت امریکہ، برطانیہ، کینیڈا اور بھارت میں منتخب شعبوں سے تعلق رکھنے والے اہل ملازمین باعزت طریقے سے ادارے سے علیحدگی اختیار کر سکیں گے۔ مائیکروسافٹ کا کہنا ہے کہ اس اقدام کا مقصد ملازمین کو معاونت فراہم کرتے ہوئے ایک نیا پیشہ ورانہ راستہ اپنانے کا موقع دینا ہے، جبکہ اس سے ادارے کو بدلتی ہوئی کاروباری ضروریات اور جدید تقاضوں کے مطابق اپنی افرادی قوت کو منظم کرنے میں بھی مدد ملے گی۔ واضح رہے کہ مائیکروسافٹ سمیت دنیا کی تمام بڑی ٹیکنالوجی کمپنیاں مصنوعی ذہانت کے ڈیٹا سینٹرز اور جدید ترین چپس پر اربوں ڈالر جھونک رہی ہیں، تاہم اس بھاری سرمایہ کاری سے حاصل ہونے والے منافع پر سرمایہ کاروں کی گہری نظریں مرکوز ہیں۔