پاکستان نے سلامتی کونسل میں ویٹو پاور کی توسیع کی مخالفت کر دی

پاکستان نے اقوامِ متحدہ کی سلامتی کونسل میں نئے مستقل ارکان کی شمولیت اور ویٹو پاور میں توسیع کی شدید مخالفت کرتے ہوئے کونسل کو زیادہ جمہوری، جامع اور منصفانہ بنانے کا مطالبہ کیا ہے۔ اقوامِ متحدہ میں پاکستان کے مستقل مشن کے قونصلر گل قیصر سروانی نے اپنے خطاب میں کہا کہ ویٹو پاور کے استحقاق میں توسیع سے سلامتی کونسل میں عدم مساوات مزید گہری ہو گی، اس لیے پاکستان اس کے خاتمے یا استعمال پر سخت پابندیوں کا حامی ہے۔ انہوں نے زور دیا کہ ویٹو کے ناجائز استعمال سے اقوامِ متحدہ کی ساکھ کو شدید نقصان پہنچا ہے اور پاکستان سلامتی کونسل میں غیر مستقل (منتخب) ارکان کی تعداد، نمائندگی اور کردار بڑھانے کی حمائت کرتا ہے تاکہ تمام ممالک کو مساوی مواقع فراہم کیے جا سکیں۔