امریکا: سالگرہ کے پیسوں سے لاٹری خریدنے والی خاتون نے بڑا انعام جیت لیا

امریکی ریاست مشی گن میں ایک خاتون کی سالگرہ کا تحفہ ان کی زندگی بدلنے کا ذریعہ بن گیا، جہاں انہوں نے آن لائن لاٹری میں ڈیڑھ لاکھ (150,000) ڈالر کا بمپر انعام جیت لیا۔

اوکلینڈ کاؤنٹی سے تعلق رکھنے والی 47 سالہ خاتون نے ‘مشی گن لاٹری’ کے حکام کو بتایا کہ ان کی سالگرہ سے چند روز قبل ان کی خالہ نے انہیں مبارکباد کے ایک کارڈ کے ساتھ کچھ رقم تحفے میں بھیجی تھی۔ خاتون نے اس رقم کو ضائع کرنے کے بجائے آن لائن گیم کارڈ خریدنے کا فیصلہ کیا۔

خاتون کے مطابق وہ ’لکی کوائنز ڈسکو پگ‘ (Lucky Coins Disco Pig) نامی آن لائن گیم کھیل رہی تھیں اور انہوں نے 20 ڈالر کی لاٹری پر قسمت آزمائی کی۔ گیم کے اختتام پر جب اسکرین پر ڈیڑھ لاکھ ڈالر کی انعامی رقم کا پیغام نمودار ہوا تو انہیں اپنی آنکھوں پر یقین نہ آیا اور انہوں نے سوچا کہ یہ شاید کوئی خواب یا غلط فہمی ہے۔ بعد ازاں لاٹری حکام نے اس بڑی کامیابی کی باضابطہ تصدیق کر دی۔