چیٹ جی پی ٹی میں حساس گفتگو لاک کرنے کا نیا فیچر متعارف

مصنوعی ذہانت کے معروف پلیٹ فارم چیٹ جی پی ٹی (ChatGPT) نے اپنے صارفین کے لیے ایک نیا سیکیورٹی فیچر متعارف کرانے کا اعلان کیا ہے، جس کے تحت اب حساس اور ذاتی نوعیت کی گفتگو کو پن کوڈ یا بائیومیٹرک تصدیق کے ذریعے لاک (Lock) کیا جا سکے گا۔

کمپنی کے مطابق یہ نیا پرائیویسی فیچر خاص طور پر ان افراد کے لیے ڈیزائن کیا گیا ہے جو اپنے اسمارٹ فونز یا لیپ ٹاپس دیگر اہل خانہ و دوستوں کے ساتھ شیئر کرتے ہیں۔ اس سہولت کے ذریعے صارفین اپنی کسی بھی چیٹ کو 4 ہندسوں کے پن کوڈ (PIN)، فیس آئی ڈی (Face ID)، یا ٹچ آئی ڈی (Touch ID) سے محفوظ بنا سکیں گے، جو کہ واٹس ایپ کے معروف ‘چیٹ لاک’ فیچر سے ملتا جلتا ہے۔

کسی بھی گفتگو کو لاک کرنے کے بعد وہ عام چیٹ ہسٹری، پن کی گئی چیٹس یا سرچ کے نتائج میں نظر نہیں آئے گی، بلکہ اسے پراجیکٹس سیکشن میں موجود ‘لاکڈ چیٹس’ (Locked Chats) کے مخصوص فولڈر میں پن یا بائیومیٹرک دے کر ہی کھولا جا سکے گا۔

واضح رہے کہ چیٹ جی پی ٹی میں پہلے سے ‘عارضی چیٹس’ (Temporary Chats) کا اپشن موجود ہے جس میں ہسٹری سیو نہیں ہوتی، تاہم ‘لاک چیٹس’ کا مقصد اپنی اہم اور حساس ہسٹری کو محفوظ رکھتے ہوئے اس تک کسی دوسرے شخص کی رسائی کو روکنا ہے۔ کمپنی کے مطابق اس فیچر کا اجرا شروع کر دیا گیا ہے اور اسے فری، گو، پلس، پرو، بزنس، اور انٹرپرائز صارفین کو مرحلہ وار فراہم کیا جا رہا ہے۔