سٹاک مارکیٹ میں تیزی، کاروبار کا مثبت رجحان رہا

پاکستان اسٹاک مارکیٹ میں کاروباری ہفتے کے چوتھے روز زبردست تیزی اور مثبت رجحان غالب رہا، جس کے نتیجے میں کے ایس ای-100 انڈیکس 768 پوائنٹس کے نمایاں اضافے کے ساتھ 1 لاکھ 66 ہزار 186 پوائنٹس کی سطح پر بند ہوا۔ ٹریڈنگ کے آغاز پر ہی مارکیٹ میں شدید خرید و فروخت کا رجحان دیکھا گیا، جہاں انڈیکس ابتدائی ساعات میں ہی 500 سے زائد پوائنٹس کا اضافہ درج کرتے ہوئے 1 لاکھ 65 ہزار 932 کی سطح پر پہنچ گیا تھا۔ واضح رہے کہ گزشتہ کاروباری روز کے اختتام پر 641 پوائنٹس کی کمی کی وجہ سے 100 انڈیکس 1 لاکھ 65 ہزار 417 پوائنٹس پر بند ہوا تھا، تاہم آج سرمایہ کاروں کی بڑھتی ہوئی دلچسپی کے باعث مارکیٹ نے پچھلے نقصان کا ازالہ کرتے ہوئے بڑی ریکوری کی ہے۔