افغان سرزمین پاکستان کے خلاف استعمال نہ ہونے دی جائے: سید ابرار حسین

مسکو میں وسطی ایشیا اور افغانستان کی سلامتی سے متعلق CSTO، CIS اور شنگھائی تعاون تنظیم (SCO) کی مشترکہ کانفرنس سے خطاب کرتے ہوئے افغانستان میں پاکستان کے سابق سفیر سید ابرار حسین نے واضح کیا ہے کہ افغانستان میں موجود دہشت گرد گروہوں کی سرگرمیاں پاکستان اور پورے خطے کے لیے سنگین خطرہ ہیں۔ انہوں نے طالبان کی افغان عبوری حکومت پر زور دیا کہ وہ اپنی سرزمین پاکستان سمیت کسی بھی ملک کے خلاف استعمال نہ ہونے دینے کے اپنے وعدوں پر مؤثر اور قابلِ تصدیق عمل درآمد کرے۔

سید ابرار حسین نے کہا کہ پاکستان ایک پرامن اور مستحکم افغانستان کا خواہاں ہے کیونکہ افغان صورتحال کے براہِ راست اثرات پاکستان پر پڑتے ہیں۔ انہوں نے کہا کہ پاکستان نے دہائیوں تک لاکھوں افغان مہاجرین کی میزبانی کی، تاہم اگست 2021ء کے بعد تحریک طالبان پاکستان (TTP) اور دیگر کالعدم تنظیموں کی افغان سرزمیں سے جاری کارروائیاں باعثِ تشویش ہیں۔ انہوں نے واضح کیا کہ افغان حکومت محض بیانات کے بجائے دہشت گردوں کے خلاف ٹھوس، نتائج دینے والے اور قابلِ تصدیق اقدامات کرے۔

کانفرنس سے روسی وزیرِ خارجہ سرگئی لاوروف نے بھی خطاب کیا اور دہشت گردی، انتہا پسندی اور منشیات کی اسمگلنگ کے خلاف علاقائی تعاون مضبوط بنانے کے ساتھ ساتھ خطے میں کسی بھی مغربی عسکری تنصیب کی مخالفت کا اعادہ کیا۔ دوسری جانب، افغان سفیر حسن گل حسن نے افغان سرزمین پر دہشت گردوں کی موجودگی کے الزامات کو مسترد کیا، تاہم پاکستانی نمائندے نے واضح کیا کہ محض زبانی دعوے کافی نہیں بلکہ سرحدی سلامتی اور علاقائی تجارتی و توانائی کے منصوبوں کے لیے عملی اقدامات ناگزیر ہیں۔