امریکا کے سامنے ہتھیار نہیں ڈالیں گے، ایرانی صدر مسعود پزشکیان

ایران کے صدر مسعود پزشکیان نے امریکہ کی جانب سے بڑھتے ہوئے دباؤ اور پابندیوں کو مسترد کرتے ہوئے واضح کیا ہے کہ امریکہ اگر یہ سمجھتا ہے کہ وہ ایران کو ہتھیار ڈالنے پر مجبور کر سکتا ہے، تو یہ اس کی خام خیالی ہے اور ایران کسی صورت امریکہ کے سامنے سر تسلیم خم نہیں کرے گا۔

تہران میں میڈیا اور عوامی نمائندوں سے گفتگو کرتے ہوئے ایرانی صدر نے امریکہ کی طرف سے لگائے گئے الزامات کی شدید مذمت کی اور کہا کہ ایران جوہری ہتھیار حاصل کرنے کی کوئی کوشش نہیں کر رہا، بلکہ ایران کے خلاف کیا جانے والا تمام منفی پروپیگنڈا سراسر جھوٹ پر مبنی ہے۔ مسعود پزشکیان نے زور دے کر کہا کہ ایران ہمیشہ سے برابری کی سطح پر سفارتی مذاکرات کا حامی رہا ہے، تاہم ایران پر عائد کی گئی امریکی معاشی پابندیاں انسانی اصولوں اور بین الاقوامی قوانین کے یکسر منافی ہیں۔

ایرانی صدر نے حالیہ مہینوں کے دوران ایرانی مفادات پر ہونے والی امریکی کارروائیوں پر سخت تشویش کا اظہار کرتے ہوئے کہا کہ ایران پر امریکی حملے مکمل طور پر بلاجواز، غیر قانونی اور غیر انسانی تھے۔ انہوں نے عالمی برادری پر زور دیا کہ وہ خطے میں امریکی یکطرفہ جارحیت کا نوٹس لے۔