ایک ہزار ڈرونز سے حملے، پوتن کا مقصد یوکرین کا مکمل خاتمہ ہے: زیلنسکی

یوکرین کے صدر وولودیمیر زیلنسکی نے روس کی جانب سے جاری شدید فضائی حملوں کی شدید مذمت کرتے ہوئے انکشاف کیا ہے کہ گزشتہ روز یوکرین پر ایک ہزار ڈرونز کے ذریعے بڑے پیمانے پر حملے کیے گئے ہیں، جس کا واضح مقصد ان کے ملک کی بنیادی تنصیبات کو تباہ کرنا ہے۔

اپنے تازہ ترین بیان میں یوکرینی صدر نے مغرب اور بالخصوص امریکی موقف پر تحفظات کا اظہار کرتے ہوئے کہا کہ بعض امریکی حلقے یہ تاثر دیتے ہیں کہ زیلنسکی سے بات کرنا مشکل اور صدر ولادیمیر پوتن کے ساتھ معاملات طے کرنا آسان ہے۔ زیلنسکی نے واضح کیا کہ روس ہماری خودمختاری اور علاقائی سالمیت کا ذرا برابر احترام نہیں کرتا اور وہ یوکرین کو بطور ایک آزاد ملک اور قوم تسلیم کرنے سے انکاری ہے۔

یوکرینی صدر کا کہنا تھا کہ یہ سمجھنا انتہائی سراسر غلط فہمی ہے کہ صدر پوتن صرف مشرقی یوکرین (ڈونباس خطے) پر قبضہ چاہتے ہیں۔ انہوں نے سوال اٹھایا کہ اگر پوتن کا ہدف صرف ڈونباس تھا تو روسی افواج نے دارالحکومت کیف پر قبضے کی کوشش کیوں کی تھی؟ زیلنسکی نے انتباہ جاری کرتے ہوئے کہا کہ اگر پوتن یوکرین کا مکمل خاتمہ کرنے میں کامیاب ہو جاتے ہیں تو 2 کروڑ سے زائد یوکرینی شہری بحیثیت پناہ گزین یورپ کی جانب ہجرت کرنے پر مجبور ہو جائیں گے، جو پورے خطے کے لیے ایک نیا انسانی اور معاشی بحران بن جائے گا۔