فریحہ ابراہیم کی ہاسٹل میں موت، فاطمہ جناح میڈیکل یونیورسٹی پر 2 کروڑ روپے جرمانہ

پاکستان میڈیکل اینڈ ڈینٹل کونسل (PMDC) نے فاطمہ جناح میڈیکل یونیورسٹی کی طالبہ فریحہ ابراہیم کی ہاسٹل میں پراسرار موت کے معاملے پر سخت ایکشن لیتے ہوئے یونیورسٹی پر 2 کروڑ روپے کا بھاری جرمانہ عائد کر دیا ہے۔

دستاویزات کے مطابق پی ایم ڈی سی کی ڈسپلنری کمیٹی نے واقعے کا تفصیلی جائزہ لینے اور یونیورسٹی انتظامیہ سے انکوائری رپورٹ طلب کرنے کے بعد پی ایم ڈی سی کونسل کی باقاعدہ منظوری سے یہ فیصلہ جاری کیا۔ کونسل نے جرمانے کے ساتھ ساتھ یونیورسٹی انتظامیہ کو ہاسٹلز اور کیمپس میں طلبہ کی سیکیورٹی، طبی معائنے، کاؤنسلنگ، ہراسانی کی روک تھام اور مینٹورشپ پروگرامز سے متعلق مؤثر نگرانی کا نظام قائم کرنے کا پابند بھی کیا ہے۔

دوسری جانب، پاکستان میڈیکل اینڈ ڈینٹل کونسل کی جانب سے فیصلے کا باضابطہ مراسلہ موصول ہونے کے بعد فاطمہ جناح میڈیکل یونیورسٹی کی انتظامیہ نے جرمانے اور فیصلے کے خلاف پی ایم ڈی سی کو نظرِ ثانی کی اپیل دائر کر دی ہے۔